ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ باستاماسىمەن ەرەكشە قاجەتتىلىكتەرى بار ادامدارعا ينۆاتاكسي قىزمەتىن كورسەتۋ ءۇشىن تاكسي اگرەگاتورلارىن پايدالانۋ جونىندەگى پيلوتتىق جوبا باستالعالى استانا مەن الماتى قالالارىندا اتالعان قىزمەت 25،9 مىڭ رەت كورسەتىلدى.
بۇگىنگى تاڭدا استانا جانە الماتى قالالارىنان پيلوتتىق جوباعا 441 ادام قاتىسۋدا، دەپ حابارلايدى Almaty-akshamy.kz ق ر ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ.
بۇدان بۇرىن حابارلاعانداي، ينۆاتاكسي قىزمەتىنىڭ ساپاسى مەن كورسەتۋ جىلدامدىعىن ارتتىرۋ ماقساتىندا ەڭبەكمينى اكىمدىكتەرمەن بىرلەسىپ وسى قىزمەتتىڭ مەحانيزمىنە وزگەرتۋ ەنگىزۋ تۋرالى شەشىم قابىلدادى. مىسالى، ازاماتتارعا قىزمەت الۋدان ءبىر كۇن بۇرىن تەلەفون ارقىلى جازىلۋ قاجەت، بۇل ءوز ساپارلارىن الدىن الا جوسپارلاۋعا، ينۆاتاكسي بەرۋدى كۇتۋگە ءماجبۇر ەتەدى، ينۆاتاكسي قىزمەتتەرىن ۇسىنۋ ءۇشىن كولىك قۇرالدارىنىڭ جەتىسپەۋشىلىگى جانە ت. ب. ماسەلەلەر بار.
شارتتاردى جەڭىلدەتۋ ءۇشىن وسى قىزمەتتى كورسەتۋگە قاتىسۋعا ءتيىستى سۇرانىس العان تاكسي اگرەگاتورلارىن تارتۋ بويىنشا پيلوتتىق جوبا جۇزەگە اسۋدا.
ادەتتە اگرەگاتور جاسالعان ساپارلاردىڭ تولەم اقىسىنان پلاتفورمالارىنىڭ پايداسىنا بەلگىلى مولشەردە پايىز اۋداراتىن بولسا، مۇنداعى باستى شارت سول پايىزدىڭ بولماۋى. وسى جۇمىستى قولداعان ياندەكس كومپانياسى پيلوتتىق جوباعا وتەۋسىز نەگىزدە قاتىسۋعا نيەت ءبىلدىردى.
ينۆاتاكسي قىزمەتىن ازاماتتار پيلوتتىق جوبا شەڭبەرىندە ياندەكس Go ءموبيلدى قوسىمشاسى ارقىلى قولدانا الادى. جوبانىڭ ەرەكشەلىگى قىزمەتتى الۋشى ءۇشىن كولىكتى تەزىرەك تاڭداۋ، ونلاين رەجيمىندە تاپسىرىس مارتەبەسىن قاداعالاۋ جانە ساپارلاردى باقىلاۋدىڭ قاراپايىم جۇيەسى. بۇل قوسىمشادا مۇگەدەكتىگى بار ادامدار جۇرگىزۋشىگە ساپارداعى ەرەكشە قاجەتتىلىكتەرى تۋرالى ەسكەرتۋى ءۇشىن ارنايى مۇمكىندىكتەر ەكرانى ىسكە قوسىلدى. ءوز كەزەگىندە جۇرگىزۋشىلەر ادامدى كولىككە وتىرعىزۋ جانە ودان تۇسۋدە قالاي كومەك كورسەتۋگە بولاتىن سەكىلدى قاجەتتى نۇسقاۋلاردى الادى.
پيلوتتىق جوباعا العاشقى كەزەڭدە استانا جانە الماتى قالالارىنان مۇگەدەكتىگى بار ادامداردىڭ فوكۋس-توبى قاتىسادى.
قىزمەت كورسەتۋدىڭ وڭ ناتيجەسى بولعان جاعدايدا جاڭا فورماتتا مۇگەدەكتىگى بار ادامداردىڭ باسقا توپتارىنا جانە ەلىمىزدىڭ بارلىق وڭىرلەرىندە جۇزەگە اسادى.