الماتىنىڭ ءبىلىم بەرۋ ۇيىمدارىندا جاڭا سپورت الاڭدارى مودەرنيزاسيالانۋدا ءارى سالىنۋدا. بۇل سالاۋاتتى ءومىر سالتىن قالىپتاستىرۋ، بالالاردىڭ سپورتپەن شۇعىلدانۋىنا جاقسى جاعداي جاساۋ جانە جالپى ولاردىڭ دەنە شىنىقتىرۋمەن قامتىلۋىن ارتتىرۋ ماقساتىندا جاسالادى، دەپ حابارلايدى almaty-akshamy.kz
بۇگىندە بيۋدجەت ەسەبىنەن قالانىڭ 46 مەكتەبىندە سپورت الاڭدارى مودەرنيزاسيالاندى. 2021 جىلى 31 مەكتەپتە، 2022 جىلى 15 مەكتەپتە مودەرنيزاسيالاۋ جۇرگىزىلدى. اعىمداعى جىلى سپورت الاڭدارىن مودەرنيزاسيالاۋ 19 مەكتەپتە جۇرگىزىلۋدە، ونىڭ 6- دا جۇمىستار اياقتالدى.
مودەرنيزاسيالاۋ بارىسىندا فۋتبول، باسكەتبول، ۆولەيبول الاڭدارى، workout-ايماقتار جاڭادان سالىنادى، جۇگىرۋ جولدارىنىڭ رەزەڭكە جابىنى، باسكەتبول قالقاندارى، ۆولەيبول تىرەكتەرى، فۋتبول قاقپالارى، گيمناستيكالىق قۇرىلىمدار مەن ورىندىقتار جاڭاردى.
ءاربىر سپورت الاڭى بويىنشا جەكە ەسەپتەۋلەر جۇرگىزىلىپ، ەسكيزدىك جوبالار ازىرلەندى. مەكتەپ جانىنداعى سپورت الاڭدارىنىڭ گەوگرافيالىق ەرەكشەلىكتەرى مەن تەحنيكالىق مۇمكىندىكتەرى ەسكەرىلدى.
وسىلايشا، الماتى اكىمدىگى ق ر ۇكىمەتىنىڭ «دەنەشىنىقتىرۋ مەن بۇقارالىق سپورتتى دامىتۋدىڭ 2025 جىلعا دەيىنگى كەشەندى جوسپارىن بەكىتۋ تۋرالى» قاۋلىسىن ىسكە اسىرادى.