مۇگەدەك ارباسىنداعى تەننيستەن ەل چەمپيوناتى الماتىدا وتەدى

16-18 قىركۇيەكتە الماتى قالاسىنداعى «ەيس» سپورت كەشەنىندە مۇگەدەك ارباسىنداعى تەننيستەن ەل چەمپيوناتى وتەدى.

قازاقستان تەننيس فەدەراسياسىنان ءمالىم ەتكەنىندەي، العاش رەت ۇيىمداستىرىلىپ وتىرعان جارىسقا ەلىمىز وڭىرلەرىنەن 12، 14، 16 جاسقا دەيىنگىلەر، 16-دان جوعارى جاسوسپىرىمدەر جانە ەرلەر مەن ايەلدەر قاتىسادى. ولار جەكەلەي جانە جۇپتىق سىندا باسەكەگە تۇسەدى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

قاتىسۋشىلار ساناتتارىنا قاراي «Standart» جانە «Quads» توپتارىنا بولىنەدى.

قازاقستان چەمپيوناتى ەكى كەزەڭگە سوزىلادى. ءبىرىنشى كەزەڭدە ويىنشىلار اينالما جۇيە بويىنشا سىنعا تۇسەدى. سوسىن جارتىلاي فينال جانە فينالدىق باسەكەلەر بولادى. ەكى سەتتەن تۇراتىن ماچتا ەسەپ 4:4 بولعان جاعدايدا تاي-برەيككە ۇلاسادى.

«بيىلدان باستاپ قازاقستان تەننيس فەدەراسياسى ارباداعى جانە اداپتيۆتىك تەننيستى كەڭىنەن دامىتۋدى قولعا الدى. مۇنىڭ بولاشاعى زور. ەل چەمپيوناتىن وتكىزۋدەگى نەگىزگى ماقسات - بالالار مەن ەرەسەكتەردى اداپتيۆتىك جانە پاراليمپيالىق تەننيسپەن اينالىسۋعا كوبىرەك تارتۋ، سونداي-اق ۇلتتىق قۇراما جاساقتاۋ ءۇشىن مىقتىلاردى انىقتاۋ»، - دەدى فەدەراسيانىڭ سپورتتى دامىتۋ جونىندەگى اتقارۋشى ديرەكتورى دەيۆ مايلي.