مۇگەدەك ادامداردىڭ جالاقىسىن ەندى جۇمىسپەن قامتۋ ورتالىقتارى سۋبسيديالايدى

سونىمەن قاتار ەڭبەك شارتى 3 جىلعا جاسالادى. 

ەڭبەك مينيسترلىگى «مۇگەدەكتىگى بار ادامداردى جۇمىسقا ورنالاستىرۋ ءۇشىن ارنايى جۇمىس ورىندارىن قۇراتىن جۇمىس بەرۋشىلەردىڭ شىعىندارىن سۋبسيديالاۋ قاعيدالارىن بەكىتۋ تۋرالى» بۇيرىعىنا وزگەرىستەر ەنگىزبەك. قۇجات «اشىق» نورماتيۆتىك-قۇقىقتىق اكتىلەر پورتالىندا جاريالاندى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«ارنايى جۇمىس ورىندارىن قۇرۋعا بايلانىستى جۇمىس بەرۋشىلەردى سۋبسيديالاۋ جونىندەگى جۇمىستاردى ۇيىمداستىرۋدى حالىقتى جۇمىسپەن قامتۋ ورتالىقتارى جەرگىلىكتى بيۋدجەت ەسەبىنەن، سونداي-اق قازاقستان رەسپۋبليكاسىنىڭ زاڭناماسىندا تىيىم سالىنباعان كوزدەردەن جۇزەگە اسىرادى. مۇنىمەن قاتار، حالىقتى جۇمىسپەن قامتۋ ورتالىعى مۇگەدەكتىگى بار ادامداردىڭ ەڭبەگىنە اقى تولەۋدى سۋبسيديالايدى»، - دەلىنگەن بۇيرىقتا.

ايتا كەتەيىك، بۇرىنعى ءتارتىپ بويىنشا سۋبسيديالاۋ رەسپۋبليكالىق بيۋدجەت ەسەبىنەن جۇزەگە اسىرىلاتىن ەدى. سونىمەن قوسا، جاڭا وزگەرىستەر نەگىزىندە ەندى مۇگەدەكتىگى بار ادامدار مەن جۇمىس بەرۋشى اراسىنداعى ەڭبەك شارتى 3 جىلعا جاسالادى. بۇرىن مۇنداي نورما بولماعان ەدى.

جاڭا قاعيدا بويىنشا حالىقتى جۇمىسپەن قامتۋ ورتالىقتارى ەرەكشە كۇتىمدى قاجەت ەتەتىن جانداردىڭ مىنا مولشەردەگى جالاقىسىن سۋبسيديالايدى:

- جۇمىسقا ورنالاسقان العاشقى 12 ايدا جالاقى مولشەرىنىڭ 70%، ءبىراق 30 اەك-تەن (ايلىق ەسەپتىك كورسەتكىش) اسپايدى؛

- جۇمىسقا ورنالاسقان 13ء-شى ايدان باستاپ 24ء-شى ايعا دەيىن جالاقى مولشەرىنىڭ 65%، ءبىراق 30 اەك-تەن اسپايدى؛

- جۇمىسقا ورنالاسقان 25ء-شى ايدان 36-شى ايعا دەيىن جالاقى مولشەرىنىڭ 60%، ءبىراق 30 اەك-تەن اسپايدى.

بۇيرىقتى اشىق تالقىلاۋ 5 جەلتوقسانعا دەيىن جالعاسادى.