زاڭدا مۇعالىمدەردىڭ كاسىبي قىزمەتىنە قاتىسى جوق جۇمىستارمەن اينالىسپاۋى كەرەكتىگى ايتىلعان.
ماجىلىستەگى "قازاقستان حالىق پارتياسى" فراكسياسىنىڭ مۇشەلەرى مۇعالىمدەردى سايلاۋعا تارتپاۋدى ۇسىندى، دەپ حابارلايدى Almaty-akshamy.kz
ءماجىلىس دەپۋتاتى، فراكسيا مۇشەسى گاۋھار تاناشيەۆا ۆيسە-پرەمەر – ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆاعا جولداعان دەپۋتاتتىق ساۋالىندا مۇعالىمدەردىڭ سايلاۋعا قاتىسۋ ماسەلەسىن قوزعادى.
ول 2022-2023 جىلدارى ەلىمىزدە 3 ءىرى سايلاۋ ناۋقانى – رەفەرەندۋم، پرەزيدەنت سايلاۋى جانە پارلامەنت ءماجىلىسى مەن ءماسليحات دەپۋتاتتارىنىڭ سايلاۋى وتكەنىن ەسكە سالدى.
"ءبىزدىڭ مۇعالىمدەر وسى سايلاۋلاردىڭ بارلىعىنا قاتىسىپ، ۋاقىتىن دايىندىققا، سايلاۋدى وتكىزۋگە جانە ناتيجەلەردى ەسەپتەۋگە ارنادى. قازاقستاننىڭ ەڭبەك كودەكسىندە، "ءبىلىم تۋرالى" جانە "پەداگوگ مارتەبەسى تۋرالى" زاڭداردا مۇعالىمدەردىڭ كاسىبي قىزمەتىنە قاتىسى جوق جۇمىستارمەن اينالىسپاۋى كەرەكتىگى ايتىلعان. الداعى ۋاقىتتا ءمۇعالىم مارتەبەسىن تومەندەتپەي، لايىقتى قۇرمەتتى ۇستازدىق كاسىپتى ساقتاپ قالعىمىز كەلسە، مۇعالىمدەردى سايلاۋعا تارتپاۋ ماسەلەسىن كوتەرۋىمىز كەرەك"، - دەدى تاناشيەۆا.
وسىعان بايلانىستى دەپۋتاتتار مۇعالىمدەردىڭ سايلاۋعا قاتىسۋىن شەكتەۋدى، مەكتەپ عيماراتتارىندا سايلاۋ ۋچاسكەلەرىن ورنالاستىرماۋدى جانە مۇعالىمدەردى سايلاۋ كوميسسيالارىنىڭ قۇرامىنا قوسپاۋدى ۇسىندى.