ەربولات دوسايەۆ الماتى پەداگوگتارىن مۇعالىمدەر كۇنىمەن قۇتتىقتادى
Almaty Theatre-دا مۇعالىمدەر كۇنىن تويلاۋعا ارنالعان سالتاناتتى ءىس-شارا ءوتتى. كاسىبي مەرەكەنى ارىپتەستەر اراسىندا اتاپ ءوتۋ ءۇشىن 600-دەن استام پەداگوگ، ەڭبەك ارداگەرلەرى، مۇعالىمدەر اۋلەتتەرىنىڭ وكىلدەرى جانە ت.ب. كەلدى، دەپ حابارلايدى almaty-akshamy.kz
قالا اكىمى ەربولات دوسايەۆ ءىس-شارا قوناقتارىن مەرەكەمەن قۇتتىقتاپ، يگى ەڭبەكتەرى جانە جاس ۇرپاقتى تاربيەلەۋگە قوسقان ۇلەسى ءۇشىن العىس ايتتى.
«ءمۇعالىم - بۇل ماماندىق ەمەس، بۇل بورىش! وسى مەرەكەگە سىزدەردىڭ جانكەشتى ەڭبەكتەرىڭىز ءۇشىن، وقۋشىلاردى ءبىلىم نارىمەن سۋسىنداتىپ، ومىرلىك تاجىريبەلەرىڭىزدى بولىسكەنىڭىزگە شەكسىز ريزاشىلىعىمىزدى ءبىلدىرۋ ءۇشىن ءار جولى ەرەكشە تەبىرەنىسپەن كەلەمىن. قۇرمەتتى مۇعالىمدەر، ءبىزدىڭ ەڭ ۇلكەن مىندەتىمىز – سىزدەردىڭ جۇمىستارىڭىزعا جاعداي جاساۋ، ءبىز بالالارىمىزعا وزىق ءبىلىم بەرۋ ءۇشىن مامانداردى دايارلاۋ مەن قايتا دايارلاۋعا ينۆەستيسيا سالۋدى جالعاستىرامىز. سىزدەردى ومىرىمىزدەگى ەڭ ماڭىزدى ءارى مارتەبەلى مەرەكەنىڭ ءبىرى – مۇعالىمدەر كۇنىمەن شىن جۇرەكتەن قۇتتىقتايمىن!»، - دەدى قالا باسشىسى.
مەرەكەلىك ءىس-شارادا «Almaty Ustazy» جانە «ۇزدىك ءبىلىم بەرۋ ۇيىمى» بايقاۋىنىڭ جەڭىمپازدارى ماراپاتتالدى. قالا مەكتەپتەرىنىڭ مۇعالىمدەرىنە ق ر ءبىلىم مينيسترلىگىنىڭ توسبەلگىسى تابىستالدى.
جاس پەداگوگتارعا ارنالعان «Almaty Ustazy» بايقاۋى 2023 جىلدىڭ 1 ساۋىرىنەن باستالىپ، ءۇش كەزەڭدە ءوتتى. ونىڭ اياسىندا 2،5 مىڭنان استام پەداگوگ زاماناۋي ءبىلىم بەرۋ ۇدەرىسىنە وزىق ادىستەمەلەر مەن سيفرلىق تەحنولوگيالاردى ەنگىزۋ بويىنشا داعدىسىن كورسەتتى. جاس مۇعالىمدەردىڭ شىعارماشىلىق الەۋەتىن اشۋ، ءمۇعالىم مارتەبەسىن ارتتىرۋ ماقساتىندا ۇيىمداستىرىلعان بايقاۋعا ءۇش جىل ىشىندە 36 جاسقا دەيىنگى 7 مىڭعا جۋىق پەداگوگ قاتىستى.
مەگاپوليس باسشىسى فينالعا شىققان بەس پەداگوگقا سينگاپۋردا وقۋ تاجىريبەسىنەن وتۋگە سەرتيفيكاتتار تابىس ەتتى.
ماراپاتتالعاندار:
- سالتانات اناپيايەۆا - №159 مەكتەپ-گيمنازياسىنىڭ قازاق ءتىلى مەن ادەبيەتى ءپانىنىڭ ءمۇعالىمى («ءتىل جانە ادەبيەت» باعىتى بويىنشا).
- ەلدار ءابدىحالىقوۆ – №168 جالپى ءبىلىم بەرەتىن مەكتەپتىڭ تاريح ءپانىنىڭ ءمۇعالىمى («ادام جانە قوعام» باعىتى بويىنشا).
- مايرا ماحابايەۆا - №202 مەكتەپ-گيمنازياسىنىڭ باستاۋىش سىنىپ ءمۇعالىمى («باستاۋىش ءبىلىم بەرۋ» باعىتى بويىنشا).
- جانسايا قىدىرحانوۆا - №206 مەكتەپ-گيمنازياسىنىڭ گەوگرافيا ءمۇعالىمى («حيميا، بيولوگيا، گەوگرافيا» باعىتى بويىنشا).
- سالتانات ەسحوجايەۆا - №24 ليسەيدىڭ ماتەماتيكا ءپانىنىڭ ءمۇعالىمى («ماتەماتيكا، فيزيكا جانە ينفورماتيكا» باعىتى بويىنشا).
ايتا كەتەيىك، باس جۇلدە يەگەرى №159 مەكتەپ – گيمنازياسىنىڭ قازاق ءتىلى مەن ادەبيەتى ءپانىنىڭ ءمۇعالىمى سالتانات اناپيايەۆا 5 ملن تەڭگە كولەمىندە جۇلدەگە يە بولدى.
بارلىق 5 جەڭىمپاز سينگاپۋردا حالىقارالىق ءبىلىم بەرۋ تاعىلىمداماسىنان وتۋگە سەرتيفيكات الادى، وندا ولار جەتەكشى مەكتەپتەردىڭ جۇمىسىمەن تانىسىپ، شەتەلدىك وقۋ ورىندارىمەن تاجىريبە الماسادى.
ءارى بايقاۋدىڭ 3 قاتىسۋشىسى №105 مەكتەپ-گيمنازياسىنىڭ ينفورماتيكا ءپانىنىڭ ءمۇعالىمى باقتيار روزييەۆ، №94 مەكتەپ-گيمنازياسىنىڭ ورىس ءتىلى مەن ادەبيەتى ءپانىنىڭ ءمۇعالىمى ديانا كرۋكوۆسكايا، №134 مەكتەپ-ليسەيىنىڭ بيولوگيا ءپانىنىڭ ءمۇعالىمى جاننا حەگاي جاسامپازدىعى جانە شىعارماشىلىعى ءۇشىن قالا اكىمىنىڭ ارنايى سىيلىعىمەن ماراپاتتالدى.
سونىمەن قاتار، ءىس-شارادا «ۇزدىك ءبىلىم بەرۋ ۇيىمى» بايقاۋىنىڭ جەڭىمپازدارى ماراپاتتالدى. المالى اۋدانىنداعى س. ا. قوجىقوۆ اتىنداعى № 39 مامانداندىرىلعان ليسەيى ەڭ جوعارى بالل (1671،43) الدى. جەڭىمپازعا ءبىلىم بەرۋ ۇيىمىن ماتەريالدىق-تەحنيكالىق جاراقتاندىرۋدى جاقسارتۋ جانە ءبىلىم بەرۋ پروسەسىن عىلىمي-ادىستەمەلىك قامتاماسىز ەتۋ ءۇشىن الماتى قالاسى اكىمىنىڭ 56 ملن تەڭگە كولەمىندەگى گرانتى بەرىلدى.
بۇعان قوسا، «الماتى مەكتەبى» باعدارلاماسى بويىنشا شۆەيساريا مەن ۇلىبريتانيانىڭ ۇزدىك وقۋ ورىندارىندا بيىل 50 مەكتەپتىڭ باسشىسى حالىقارالىق اكادەميالىق تاعىلىمدامادان وتەدى.