قونايەۆ قالاسىنىڭ كوپبەيىندى اۋرۋحاناسىندا مەديسينالىق-سانيتاريالىق العاشقى كومەكتىڭ ۇزدىك پراكتيكاسى ورتالىعى (مساك) اشىلدى.
ورتالىقتىڭ جۇمىسى حالىققا مەديسينالىق كومەك كورسەتۋ ساپاسىن جاقسارتۋعا باعىتتالاتىن بولادى، دەپ حابارلايدى اlmaty-akshamy.kz.
"بۇگىن الماتى وبلىسىندا وسىنداي ەكىنشى ورتالىق اشىلۋدا. ەندى ناۋقاستاردىڭ الەۋمەتتىك جاعدايىنا دا ەرەكشە نازار اۋدارىلاتىن بولادى. ويتكەنى، وزىق پراكتيكا ورتالىعىنىڭ جۇمىسى وتباسىلىق مەديسيناعا نەگىزدەلگەن. ورتالىقتا ءبىزدىڭ ازاماتتارعا كەشەندى مەديسينالىق، الەۋمەتتىك، پسيحولوگيالىق كومەك كورسەتىلەدى"، - دەدى الماتى وبلىسى اكىمىنىڭ ورىنباسارى رۋستام يساتايەۆ.
ءوز كەزەگىندە وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى لەيلا سەرىكبايەۆا قازىرگى ۋاقىتتا العاشقى كومەك كورسەتۋ قاعيداتتارى ايتارلىقتاي وزگەرگەنىن اتاپ ءوتتى.
ونىڭ ايتۋىنشا، وتباسىلىق دارىگەرلەر ءار سالاداعى مەديسينا قىزمەتكەرىن الماستىراتىن ۋاقىت كەلەدى، اۋرۋدىڭ پروفيلاكتيكاسى قىزمەتتەرىنىڭ سانى ارتادى. وكىنىشكە وراي، جىلدان جىلعا زورلىق-زومبىلىققا ۇشىراعان انالار مەن بالالاردىڭ سانى ارتىپ كەلەدى. سوندىقتان ءبىزدىڭ قوعامداعى الەۋمەتتىك قىزمەتكەرلەردىڭ ءرولى وتە ماڭىزدى، پسيحيكالىق دەنساۋلىق ءبىرىنشى ورىنعا شىعادى.
جالپى، جاڭا مەكەمەدە 13 جوبا ىسكە اسىرىلدى. ولاردىڭ ەكەۋى مەديسينا قىزمەتكەرلەرىنىڭ قىزمەتىنە باعىتتالعان، قالعاندارى حالىقپەن، پاسيەنتتەرمەن جۇمىس ىستەۋگە نەگىزدەلگەن. ونىڭ ىشىندە "حالىق كەڭەسى" جوباسى دا بار. وسى جوبانىڭ شەڭبەرىندە مەديسينا قىزمەتكەرلەرى كەلىپ تۇسكەن شاعىمدار مەن ۇسىنىستار بويىنشا حالىقپەن كەرى بايلانىس ورناتاتىن بولادى.
سودان كەيىن قازاقستاندا وزىق پراكتيكا ورتالىعىنىڭ ءادىسناماسىن ەنگىزگەن پروفەسسور، "Primary Health Care" ق ر ۇلتتىق مەديسينالىق العاشقى كومەك قاۋىمداستىعىنىڭ پرەزيدەنتى تولەباي راكىپبەكوۆ دۇنيەجۇزىلىك دەنساۋلىق ساقتاۋ ۇيىمى بۇل جوبانى ەۋروپانىڭ 53 ەلىندە الەمدەگى العاشقى دەمونستراسيالىق پلاتفورما رەتىندە ۇسىنعانىن اتاپ ءوتتى. ەلىمىزدەگى العاشقى وسىنداي ورتالىق ەڭبەكشىقازاق اۋدانىندا اشىلدى، جاقىن بولاشاقتا وسىنداي ورتالىق كەگەن اۋدانىندا دا پايدا بولادى.