الماتىدا "وسوبەننىي دوكتور" ينكليۋزيۆتى سەريالىنىڭ ەكىنشى سەرياسىنىڭ تۇساۋكەسەرى ءوتتى.
داۋن سيندرومى بار بالالار قازاقستان فيلمىندە باستى ءرولدى سومدادى، دەپ حابارلايدى Almaty-akshamy.kz
ەرەكشە دەتەكتيۆتى ميني-سەريالدا باستى رولدەردى قازاقستاندىق كينو جۇلدىزدارىمەن قاتار، داۋن سيندرومى بار بالالار سومدايدى.
"وسوبەننىي دوكتور" قىسقامەتراجدى ءفيلمىنىڭ ءتۇسىرىلىمى الماتى مەن استانا قالالارىندا ءوتتى. وعان تانىمال وتاندىق ارتىستەر ازيز بەيشەنالييەۆ پەن گالينا تابالا قاتىسقان. سونداي-اق كارتيناداعى باستى رولدەردىڭ ءبىرىن داۋن سيندرومى بار مارتا پەرمينوۆا سومدادى. ءفيلمدى ونىڭ اتا-اناسى – رەجيسسەر، سەناريست جانە پروديۋسەر سوفيا ۆيتۆەر جانە كومپوزيتور سەرگەي پەرمينوۆ ءتۇسىردى.
قازاقستاندىق كورەرمەندەر قىسقامەتراجدى ءفيلمدى زور ىقىلاسپەن قابىلدادى. ءتۇسىرىلىم توبى ءوز تۋىندىلارىنان شابىت الىپ، جۇمىستارىن جالعاستىرۋ تۋرالى شەشىم قابىلدادى. وسىلايشا، كاسىبي اكتەرلار مەن داۋن سيندرومى بار بالالاردىڭ قاتىسۋىمەن ميني-سەريال ءتۇسىرۋ يدەياسى پايدا بولدى.
ەكىنشى سەريا الماتى مەن ونىڭ ماڭىندا ءتۇسىرىلدى. ءبىرىنشى سەريانىڭ باستى جۇلدىزى مارتا پەرمينوۆا بۇل جولى تۇسىرىلىمگە قاتىسپادى، ءبىراق الاڭدا ءجۇرىپ، بارلىق وقيعالاردىڭ كۋاسى بولدى. جاڭا لەنتادا ونىڭ دوستارى – داۋن سيندرومى بار دامير مەن ارلان بوي كورسەتتى.
سونىمەن قاتار بۇل جولى كومانداعا قازاقستاننىڭ حالىق ءارتىسى تاتيانا تارسكايا، بەلگىلى قازاقستاندىق ارتىستەر – الەكسەي شەمەس، شىڭعىس قاپين، كارينا ۆولكوۆا، ورىنباسار تازابەكوۆ، ارتەم گانسيەۆ قوسىلدى.
رەجيسسەر سوفيا ۆيتۆەر ەكىنشى سەريانىڭ تۇساۋكەسەرى الدىندا داۋن سيندرومى بار بالالاردىڭ باسقا اكتەرلار سەكىلدى سەناريي بويىنشا وينامايتىنىن ەسكەرتتى. ايتۋىنشا، ولاردىڭ ەكرانداعى سوزدەرىن سەناريستەر جازباعان. بالالار كارتينادا ارتىستەرمەن ءوز بەتىنشە قارىم-قاتىناس جاساپ، ءوز قالاۋلارى بويىنشا ارەكەت ەتەدى.
حالىق ءارتىسى تاتيانا تارسكايا كەيىپكەردىڭ اناسىن، دەمەنسيامەن اۋىراتىن ادامدى سومدايدى. رەجيسسەر ءارتۇرلى جاستاعى ەرەكشە ادامداردى كورسەتكىسى كەلگەن.
سونداي-اق سوفيا ۆيتۆەر ءتۇسىرىلىمنىڭ قارجىلىق ماسەلەسىن دە ايتىپ ءوتتى.
"مادەنيەت مينيسترلىگى كومەكتەستى – اقشامەن ەمەس، اپپاراتۋرامەن. مەن ءوزىمنىڭ بارلىق رەسۋرستارىمدى پايدالاندىم. مۇددەلى ادامدار كومەكتەسەدى. ءبىز ءبارىن دەرلىك ءتۇسىرىپ بولدىق، تاعى ەكى ءتۇسىرىلىم كۇنىن ۇيىمداستىرۋ قالدى. سونىمەن قاتار، 3-4 سەريانىڭ مونتاجىن جاسايمىز"، – دەپ ءبولىستى رەجيسسەر.
ونىڭ ايتۋىنشا، 3 جانە 4 سەريانىڭ تۇسىرىلىمدەرى مەن مونتاجى اياقتالعاننان كەيىن تۋىندى تەلەديدار مەن پلاتفورمالارعا ۇسىنىلادى.
"ەگەر سەريال قازاقستاندا وسىنداي فورماتتا قابىلدانسا، جازدا شىعۋى مۇمكىن. سونداي-اق كۇزگە قاراي مەن ونى تولىق مەترگە قايتا مونتاجداۋدى جوسپارلاپ وتىرمىن. بۇل وي ىسكە اسسا، فيلم كۇزدە تولىق مەتر رەتىندە شىعۋى مۇمكىن"، – دەيدى رەجيسسەر.
پسيحولوگ جانە كوگنيتيۆتى پسيحوتەراپيەۆت ۆيكتوريا ليەۆينانىڭ ايتۋىنشا، اتالعان ءفيلمنىڭ ارقاسىندا جاس ارتىستەر دە، ولاردىڭ اتا-انالارى دا ماڭىزدى تاجىريبەگە يە بولدى.
"داۋن سيندرومى بار بالالار اتا-انالارىن اينالاداعى ادامداردىڭ پىكىرىنە ءتوزىمدى ءارى ول پىكىرلەردەن تاۋەلسىز بولۋعا ۇيرەتەدى. كوپشىلىكتىڭ كوڭىل-كۇيىنە جانە جالپى قابىلدانعان نورماعا بەيىم بولعاندى بىلدىرەتىن "كونفورميزم" دەگەن ۇعىم بار. ادامداردىڭ ءبىرتۇرلى نەمەسە تاڭعالىسپەن قاراۋلارىنا توتەپ بەرۋ – وتە قيىن مىندەت. مۇنداي جاعدايدا باستىسى – اگرەسسياعا بەرىلمەۋ. ءبىز بالامىزدى سول كۇيى – فيزيولوگيالىق دامۋدىڭ، ويلاۋدىڭ كىدىرۋىمەن قابىلداي وتىرىپ، ونىڭ وزگەشەلىگىن دە قابىلدايمىز. بۇل ارقىلى اتا-انالار توزىمدىرەك بولا تۇسەدى. داۋن سيندرومى بار بالالار اتا-انالارىن وسى الەمنىڭ بارلىق الۋان تۇرلىلىگىن قابىلداۋعا ۇيرەتەدى. مۇنداي بالانىڭ دامۋى ونىڭ قورشاعان ورتاسىنا بايلانىستى. ولار تاۋەلسىز بولا الادى. اتا-انالار 6-7 جاسىنان باستاپ بالانى ەڭبەكقور، باستاماشىل ەتىپ تاربيەلەۋى كەرەك. ول ءوزىن تولىققاندى سەزىنۋى قاجەت. شامادان تىس اياۋشىلىق تانىتۋعا بولمايدى"، – دەپ اتاپ ءوتتى ۆيكتوريا ليەۆينا.