ماجارستان استاناسى بۋداپەشتەگى WKF كاراتەدەن الەم چەمپيوناتى قازاقستان ءۇشىن تاريحي ناتيجەمەن ەستە قالدى، دەپ حابارلايدى almaty-akshamy.kz ق ر تۋريزم جانە سپورت مينيسترلىگى سپورتتى دامىتۋ ديرەكسياسىنىڭ باسپا ءسوز قىزمەتىنە سىلتەمە جاساپ.
كۋميتە باعدارلاماسىندا 50 كگ دەيىنگى سالماقتا ۇلتتىق قۇراما سپورتشىسى ءمولدىر جاڭبىرباي ەشكىمگە دەس بەرمەدى. ول فينالدا تاجىريبەلى يتاليالىق ەرمينيا پەرفەتتوعا ەش مۇمكىندىك بەرگەن جوق.
ءمولدىر جارتىلاي فينالدا الەم رەيتينگىنىڭ كوشباسشىسى سالازار يورگەليستى (ۆەنەسۋەلا) ايقىن باسىمدىقپەن تىزە بۇكتىرىپ، سەنساسيا جاساعان. ال وعان دەيىن حانچجوۋداعى ازيا ويىندارىنىڭ كۇمىس جۇلدەگەرى 3-سەكسيادا الجير، جاپونيا، سلوۆاكيا كاراتەشىسىن قاپى قالدىرعان. بۇل سالماقتا بۋداپەشتە 56 ەلدىڭ تاڭداۋلى اتلەتى كۇش سىناستى.
ءمولدىر سپورتتىڭ وسى تۇرىنەن ەرەسەكتەر اراسىندا الەم چەمپيونى اتانعان تۇڭعىش قازاق. وسىعان دەيىن 2008 جىلى دارحان ءاسادىلوۆ فينالعا جەتىپ، قارسىلاسىنا ەسە جىبەرگەن.