7 ماۋسىمدا بۇۇ جانىنداعى ايەلدەرگە قاتىستى كەمسىتۋشىلىكتىڭ بارلىق نىساندارىن جويۋ جونىندەگى كوميتەت (CEDAW) مۇشەلەرىن سايلاۋ ءوتتى. ونىڭ قۇرامىنا العاش رەت قازاقستان وكىلى دە كىردى، دەپ حابارلايدى اlmaty-akshamy.kz
ق ر ءسىم باسپا ءسوز قىزمەتىنىڭ حابارلاۋىنشا، بىرىككەن ۇلتتار ۇيىمىنىڭ ايەلدەرگە قاتىستى كەمسىتۋشىلىكتىڭ بارلىق نىساندارىن جويۋ جونىندەگى كونۆەنسياسىنا قاتىسۋشى مەملەكەتتەردىڭ 23ء-شى كەڭەسى شەڭبەرىندە بۇۇ شتاب-پاتەرىندە 2025-2028 جىلدار كەزەڭىنە ايەلدەرگە قاتىستى كەمسىتۋشىلىكتىڭ بارلىق نىساندارىن جويۋ جونىندەگى كوميتەت (CEDAW) مۇشەلەرىن سايلاۋ ءوتتى. العاش رەت قازاقستاننان كانديدات – بەلگىلى قازاقستاندىق ديپلومات ءمادينا جاربوسىنوۆا CEDAW قۇرامىنا سايلاندى.
"بۇل ماڭىزدى تاريحي وقيعا، ويتكەنى بۇعان دەيىن بۇۇ-نىڭ وسى ماڭىزدى ورگانىندا ورتالىق ازيا ەلدەرىنىڭ ەشقايسىسى ۇسىنىلماعان"، دەلىنگەن ۆەدومستۆو حابارلاماسىندا.
ورتالىق ازيا ەلدەرى اراسىندا قازاقستان – گەندەرلىك تەڭدىك سالاسىنداعى پروگرەسس بويىنشا كوشباسشى. قازاقستان 146 ەل اراسىنداعى گەندەرلىك تەڭدىكتى باعالاۋ ءۇشىن ازىرلەنگەن 2023 جىلعى جاھاندىق گەندەرلىك الشاقتىق يندەكسىندە 62ء-شى ورىنعا يە بولىپ، پوزيسياسىن جاقساردى جانە 18 ورىنعا كوتەرىلدى.
قازاقستانمەن قاتار CEDAW-دا 11 ورىنعا 20 مەملەكەتتىڭ وكىلدەرى ۇمىتكەر بولدى – ومان، شۆەيساريا، ليۆان، نيدەرلاند، گۆاتەمالا، اندوررا، اۋستراليا، نەپال، گرۋزيا، چيلي، باربادوس، قحر، زيمبابۆە، بۋرۋندي، كامەرۋن، موزامبيك، سولتۇستىك ماكەدونيا، ۋرۋگۆاي، ۇلىبريتانيا جانە توگو.