ەلىمىزدىڭ كەيبىر ايماعىندا ميتينگ وتكىزۋ شارتتارىنا وزگەرىستەر ەنگىزىلۋى مۇمكىن. «اشىق نقا» پورتالىندا كوپتەگەن قالا، اۋدان اكىمدىكتەرى بەيبىت جينالىستاردى ۇيىمداستىرۋعا جانە وتكىزۋگە ارنالعان ورىندارعا قاتىستى قولدانىستاعى نورماتيۆتىك قۇقىقتىق اكتىلەردى وزگەرتەتىن جەرگىلىكتى ءماسليحاتتاردىڭ جاڭا شەشىمدەرىنىڭ جوباسىن جاريالادى.
ەگەر وزگەرىستەر قابىلدانسا، كەي اۋداندا بۇقارالىق نارازىلىق شارالارىن وتكىزۋگە تىيىم سالىنعان اۋماقتاردىڭ شەڭبەرى بىردەن 8 ەسە ارتىپ شىعا كەلمەك. ماماندار مۇنىڭ زاڭ اياسىنداعى راسىمدەر ەكەنىن ايتادى.
بۇل قۇجاتتار سونىمەن بىرگە:
- بەيبىت جينالىستاردى ۇيىمداستىرۋ جانە وتكىزۋ ءۇشىن ارنايى ورىنداردى پايدالانۋ ءتارتىبىن؛
- ميتينگ وتەتىن ارناۋلى ورىنداردىڭ شەكتى تولۋ نورمالارىن؛
- بەيبىت جينالىستاردى ۇيىمداستىرۋ جانە وتكىزۋ ءۇشىن ارنايى ورىنداردى ماتەريالدىق-تەحنيكالىق جانە ۇيىمداستىرۋشىلىق قامتاماسىز ەتۋگە قويىلاتىن تالاپتاردى قايتا قارايدى.
قۇجاتتار پيكەت وتكىزۋگە تىيىم سالىنعان ىرگەلەس اۋماقتاردىڭ شەكارالارىن قايتا ايقىندايدى. بۇعان قوسا ىرگەسىندە ميتينگ، پيكەت وتكىزۋگە تىيىم سالىنعان نىساندار قاتارىنان «تۇڭعىش پرەزيدەنتتىڭ رەزيدەنسيالارى» الىنىپ تاستالدى. تەك ق ر پرەزيدەنتىنىڭ رەزيدەنسيالارىنا ىرگەلەس جاتقان اۋماقتاردا نارازىلىق اكسياسىن ۇيىمداستىرۋعا سالىنعان تىيىم ساقتالدى.
ەلوردانىڭ اكىمدىگى دە «استانا قالاسىندا بەيبىت جينالىستاردى ۇيىمداستىرۋ جانە وتكىزۋ ءۇشىن ارنايى ورىنداردى انىقتاۋ تۋرالى» ءماسليحاتتىڭ جاڭا شەشىمىنىڭ جوباسىن جاريا ەتتى.
وندا وزگە وزگەرىستەر سىرتىندا، بەيبىت جينالىستار، سونىڭ ىشىندە ميتينگتەر، شەرۋلەر مەن پيكەتتەر ۇيىمداستىرۋعا بولاتىن ورىندار سانى ارتتىرىلدى.
بۇعان دەيىن 2020 جىلعى 30 ماۋسىمنان بەرى قولدانىلىپ كەلگەن «نۇر-سۇلتان قالاسىندا بەيبىت جينالىستاردى ۇيىمداستىرۋ جانە وتكىزۋ ءۇشىن ارنايى ورىنداردى انىقتاۋ تۋرالى» ءماسليحات شەشىمىنە سايكەس، باس قالادا بەيبiت جينالىستار، ميتينگتەر، شەرۋلەر، پيكەتتەر وتكىزۋگە 3 ورىن عانا بولىنگەن بولاتىن.
ولار:
- ا. پۋشكين كوشەسى مەن ش. قۇدايبەردى ۇلى داڭعىلى قيىلىسىنداعى ساياباق؛
- «ستوليچنىي» سيركى جانىنداعى الاڭ؛
- جەڭىس، اباي داڭعىلى، ت. بەگەلدينوۆ جانە جەلتوقسان كوشەلەرى ءتورتبۇرىشىنداعى الاڭ.
ءماسليحاتتىڭ جاڭا شەشىمىنىڭ جوباسىندا استانادا بەيبiت جينالىستار، ميتينگتەر، شەرۋلەر، پيكەتتەر وتكىزۋگە ارنالعان ورىندار سانى 5-كە دەيىن كوبەيمەك.
توتەنشە، سوعىس جاعدايى نەمەسە تەرروريزمگە قارسى وپەراسيانىڭ قۇقىقتىق رەجيمى ەنگىزىلگەن كەزدە بەيبىت جينالىستار وتكىزۋگە تىيىم سالىنۋى نەمەسە شەكتەۋ قويىلۋى مۇمكىن.
بەيبىت جينالىستار تەك جەرگىلىكتى ءماسليحات سونى وتكىزۋ ءۇشىن ايقىنداعان ورىندا نەمەسە ءجۇرۋ مارشرۋتى بويىندا ىسكە اسىرىلسا عانا بەيبىت جينالىس دەپ تانىلادى. باسقا جاعدايلاردا ماجبۇرلەپ تاراتىلۋى مۇمكىن.
بەيبىت جينالىس سيپاتىنا قاراي بەيبىت بولۋعا، كۇش قولدانىلماۋعا، قاتىسۋشىلارى قارۋلانباۋعا ءتيىس. ولار «مەملەكەتتىك قاۋىپسىزدىك، قوعامدىق ءتارتىپ، دەنساۋلىق ساقتاۋ، حالىقتىڭ يماندىلىعى، باسقا ادامداردىڭ قۇقىعى مەن بوستاندىعىن قورعاۋ مۇددەلەرىنە قاتەر توندىرمەۋگە» مىندەتتى.
شەرۋ كەزىندە قوعامدىق ماڭىزى بار ماسەلەلەردى كوتەرۋگە، تۇلعالاردىڭ، ورگانداردىڭ، ۇيىمداردىڭ ارەكەتتەرىنە نە ارەكەتسىزدىگىنە نارازى پىكىر جاريالاۋعا، دىبىس كۇشەيتكىش تەحنيكالىق قۇرالدارمەن نە ونسىز ۇرانداۋعا، پلاكاتتار، ترانسپارانتتار جانە وزگە دە كورنەكى ۇگىتتەۋ قۇرالدارىن كوتەرۋگە رۇقسات.