الدىمەن بۋىندىرىلىپ ولتىرىلگەن بويجەتكەننىڭ دەنەسى تابىلعان
اقش-تا تاۋعا كەتىپ، جوعالىپ كەتكەن ساياحاتشى بلوگەرلەردىڭ تاريحى درامالىق سيپات الا باستادى. فەدەرالدى تەرگەۋ باسقارماسى بلوگەر براين ءلوندريدىڭ ءولى دەنەسى مەن جەكە زاتتارىن تاپتى. بۇعان دەيىن ونىڭ جانىندا بولعان بويجەتكەن گاببي پەتيتونىڭ تۇنشىعىپ ولگەن مۇردەسىن تاپقان ەدى. قالىندىعىنىڭ ولىمىنە جاس بلوگەردىڭ قاتىسى بار ما جانە ونىڭ ءوزى نەدەن كوز جۇمدى؟
ءقازىر بۇكىل امەريكا وسى جاعدايدى تالقىلاپ جاتىر. ويتكەنى بۇل جايت گولليۆۋدتىق ءفيلمنىڭ سەنارييىنە ۇقساس. دەگەنمەن، ءىس جۇزىندە نە بولعانىن ەشكىم بىلمەيدى، ساياحاتشى جۇپتىڭ اراسىندا ناقتى قانداي جاعداي بولعانى جۇمباق كۇيىندە قالىپ وتىر، دەپ حابارلايدى Almaty-akshamy.kz
.
«ۆەستي» تەلەارناسىنىڭ مالىمەتىنشە، 23 جاستاعى برايان ءلوندريدىڭ اتا-اناسى پوليسياعا ۇلىن ىزدەۋگە كومەكتەسكەن، ناتيجەسىندە ۇلتتىق ساياباقتان ونىڭ مۇردەسى مەن جەكە زاتتارى تابىلعان. ءقازىر بۇل ءىستى تەرگەۋمەن ەلدەگى فتب-ى اينالىسىپ جاتىر.
«ءبىزدىڭ تەرگەۋ توبىمىز وقيعا بولعان جەردە تەرگەۋ امالدارىن جۇرگىزىپ جاتىر، ولار سول اۋماقتى تۇگەلدەي تەكسەرۋ ءۇشىن بارلىق كريمينالدىق رەسۋرستى پايدالانۋدا. جۇمىس توبى ول جەردە ءالى بىرنەشە كۇن جۇمىس ىستەۋى مۇمكىن. بارلىقتارىڭىزدا سۇراق كوپ ەكەنىن بىلەمىن، ءبىراق بىزدە ءالى ناقتى جاۋاپ جوق. كوكەيىمىزدەگى سۇراقتاردىڭ بارلىعىنا جاۋاپ تابۋ ءۇشىن ءبىز تىنىمسىز جۇمىس ىستەپ جاتىرمىز»،-دەدى فتب-نىڭ ارنايى اگەنتى مايكل ماكفەرسون.
ءيا، بلوگەرلەردىڭ جۇمباق ولىمىنە قاتىستى سۇراق جۋرناليستەر مەن تەرگەۋ قىزمەتىندە عانا ەمەس، مارقۇمداردىڭ الەۋمەتتىك جەلىدەگى جازىلۋشىلارىندا دا كوپ. گاببي پەتيتو مەن برايان لوندري وسىدان بىرنەشە اي بۇرىن اقش بويىنشا ساياحات جاساۋعا اتتانادى. ولار بارعان جەرى تۋرالى مالىمەتتەردى الەۋمەتتىك جەلىگە جاريالاپ، اسەرلەرىمەن ءبولىسىپ وتىرعان. الايدا بويجەتكەن كەنەتتەن جوعالىپ كەتەدى. ساپاردىڭ بىرىنەن ورالعان ونىڭ عاشىعى گاببي جايلى ايتۋدان باستارتادى، ارتىنشا ءوزى دە جوعالىپ كەتەدى. ارادا بىرنەشە كۇن وتكەندە بۋىندىرىلىپ ولتىرىلگەن قىزدىڭ دەنەسى ۇلتتىق ساياباقتان تابىلادى. مىنە، ارادا ەكى ايداي ۋاقىت وتكەندە جىگىتتىڭ دەنەسى مەن جەكە زاتتارى دا تابىلدى. پوليسيا جىگىتتىڭ مۇردەسى تابىلعان جەردى جاقىندا سۋ باسقاندىقتان، ايعاقتاردى ساراپتاماندان وتكىزۋ قيىنعا سوعىپ وتىرعانىن جەتكىزدى. تىپتەن، مەديسينالىق ساراپتامانى ءتىس دارىگەرلەرىنىڭ كومەگىمەن جاساپتى. بلوگەردىڭ مۇردەسى جاتقان جەردە ونىڭ سومكەسى مەن قويىنداپتەرى دە بولعان.
«وعان بولعان جايتتىڭ بارلىعىن قويىنداپتەرىنە جازۋ ءۇشىن ۋاقىت قاجەت بولعان بولۋى مۇمكىن. وندا كەشىرىم سۇراعان جازباسى دا بار شىعار. بويجەتكەن گاببيدىڭ وتباسىنا كىم بولسا دا جاۋاپ بەرۋى كەرەك. بۇل قويىنداپتەردە ناقتى جاۋاپ بارىنا سەنىمدىمىن،-دەيدى كريميناليست كەيسي دجوردان.
قىز بەن جىگىتتىڭ وتباسى بىر-بىرىمەن ارالاسپايدى. ولار جۋرناليستەرگە قاراعاندا كوپ نارسەدەن حاباردار بولۋى مۇمكىن، ءبىراق ءتىسجارماي وتىر. اقش زاڭى بويىنشا جەكە ءومىردىڭ قۇپياسى قاتاڭ ساقتالادى. رەسمي مالىمدەمەلەرگە قاراعاندا گاببيدىڭ ولىمىندە ەشقانداي ميستيكالىق سيپات جوق سياقتى. الايدا، ينتەرنەت قولدانۋشىلاردىڭ باسىم كوپشىلىگى باستاپقىدا بۇل جاعدايدى ميستيكالىق ولىمگە تەڭەگەن ەدى. ويتكەنى قىز ادام جۇرمەيتىن تابيعات اياسىندا كەنەتتەن جوعالىپ كەتتى.
«كەشە گاببي پەتيتونىڭ اكەسىمەن سويلەسۋدىڭ رەتى كەلدى. ونىڭ ءحالىن ءبىلىپ، قاندايدا ءبىر كومەك كورسەتە الامىن با دەپ سۇرادىم. ول قىزىنىڭ وتباسىلىق زورلىق-زومبىلىقتىڭ قۇربانى بولعانىنا ناق سەنىمدى. مەن دە ونىمەن كەلىسەمىن. ءبىز كەيدە جاۋاپقا تارتىلۋى كەرەك ادامداردى بايقايمىز، ءبىراق ءۇنسىز قالامىز. ال ولاردىڭ ارەكەتى ۇلعايا تۇسەدى دە، ارتى قايعىلى جاعدايعا اكەلگەندە عانا سان سوعىپ قالامىز»،-دەيدى فلوريدانىڭ گۋبەرناتورى رون دەسانتيس.
ساياحات بارىسىندا قىزدىڭ ءوز جىگىتىنىڭ قولىنان قازا تاپقانىن پوليسيا كامەراسىنداعى جازبا دا ايعاقتاي تۇسەدى. قىدىرۋعا كەتكەن قىزدىڭ كولىكتە جىلاپ تۇرعانى پوليسيانىڭ كۇمانىن تۋدىرعان. ونى بايقاعان پوليسيا كولىكتى توقتاتىپ، بويجەتكەننەن ءبارى دۇرىس پا دەپ سۇرايدى. الايدا، قىز جىگىنە ارىز جازباعان، كەزدەسۋ تەك اڭگىمە تۇرىندە اياقتالعان. وسى كەزدە قىز قاتتى قاتەلەسسە كەرەك. ەگەر سول ساتتە جانىنداعى ادامنان بويىن اۋلاق العاندا مۇمكىن ءتىرى قالار ما ەدى.