رەسەيدە 30-دان اسا ادامنىڭ ولىمىنە سەبەپشى بولعان سۋسىن قازاقستاندا ساتىلىمنان الىنىپ تاستالدى، دەپ حابارلايدى Almaty-akshamy.kz سانيتارلىق-ەپيدەميولوگيالىق باقىلاۋ كوميتەتىنە سىلتەمە جاساپ.
سوڭعى بىرنەشە كۇن بويى رەسەيدىڭ سامارا قالاسىندا ورنالاسقان «اندي» جاۋاپكەرشىلىگى شەكتەۋلى قوعامى وندىرەتىن «ميستەر سيدر» دەپ اتالاتىن الكوگولى از سۋسىندى تۇتىنعاندار جاپپاي ۋلانعان.
كەشە اتالعان ىشىمدىكتەن ۋلانىپ، كوز جۇمعاندار سانى 32-گە جەتتى. جالپى، 90 ادام ءقازىر اۋرۋحانادا جاتىر، ونىڭ وتىزىنىڭ جاعدايى وتە اۋىر.
وسىعان بايلانىستى سانيتارلىق-ەپيدەميولوگيالىق باقىلاۋ كوميتەتى الكوگول ءونىمىن يمپورتتاۋشىلار مەن وتكىزۋشىلەردى حاباردار ەتۋ جانە ءمان-جاي انىقتالعانعا دەيىن اتالعان ءونىمدى ساتىلىمنان ۋاقىتشا الىپ تاستاۋ قاجەتتىگىن ايتىپ، اۋماقتىق دەپارتامەنتتەرگە تاپسىرما بەردى.
كوميتەت ءىستىڭ ەگجەي-تەگجەيى انىقتالعانعا دەيىن جوعارىدا اتالعان ءونىمدى پايدالانۋدان باس تارتۋعا جانە مۇنداي ءونىم ساتىلىپ جاتسا، ول جايلى كوميتەتكە نەمەسە وبەكتىنىڭ ورنالاسقان جەرى بويىنشا اۋماقتىق بولىمشەلەرگە دەرەۋ حابارلاۋعا شاقىرادى.