قورعانىس ءمينيسترىنىڭ ءبىرىنشى ورىنباسارى – قازاقستان رەسپۋبليكاسى قارۋلى كۇشتەرى باس شتابىنىڭ باستىعى گەنەرال-لەيتەنانت سۇلتان قامالەتدينوۆ جانە قورعانىس مينيسترلىگى اپپاراتىنىڭ باسشىسى پولكوۆنيك ەربول قۇماربەك ۇلى بەلارۋس رەسپۋبليكاسى قارۋلى كۇشتەرى باس شتابىنىڭ قۇرىلۋ كۇنىنە ارنالعان ءىس-شاراعا قاتىستى.
ساپار اياسىندا قازاقستان قورعانىس مينيسترلىگىنىڭ وكىلدەرى 1941 جىلدىڭ ماۋسىم-شىلدە ايلارىندا نەمىس-فاشيست باسقىنشىلارىنىڭ العاشقى سوققىسىن قابىلداعان برەست بەكىنىسىنىڭ قاھارمان قورعاۋشىلارىن ەسكە الدى، دەپ حابارلايدى aqshamnews.kz قورعانىس مينيسترلىگىنە سىلتەمە جاساپ.
مينسك قالاسىندا قارۋلى كۇشتەر باس شتابىنىڭ باستىعى گەنەرال-لەيتەنانت سۇلتان قامالەتدينوۆ بەلارۋس ارىپتەسى گەنەرال-مايور پاۆەل مۋراۆەيكومەن كەزدەستى.
تاراپتار شىۇ، تمد، ۇقشۇ شەڭبەرىندەگى ىنتىماقتاستىق اسپەكتىلەرىن قوزعاپ، وڭىرلىك قاۋىپسىزدىك پەن ەكىجاقتى قاتىناس ماسەلەلەرىن تالقىلادى.
– بيىلعى جىلى قازاقستان مەن بەلارۋس اۋماعىندا ەكى ەل بولىمشەلەرىنىڭ قاتىسۋىمەن بىرنەشە ءىس-شارالاردى وتكىزۋگە مۇمكىندىك تۋدى. ونىڭ بارلىعى ساپا مەن سىندارلى تاسىلمەن ەرەكشەلەنەدى. ءبىزدىڭ اسكەري قىزمەتشىلەر ەكىنشى رەت قاتىسىپ وتىرعان «ەرلىك پەن شەبەرلىك» سىناقتارىن ۇيىمداستىرۋدىڭ جوعارى دەڭگەيى ءۇشىن العىس بىلدىرەمىن، – دەپ ناقتىلادى ول.
بەلارۋس جوعارى وقۋ ورىندارىندا ءبىزدىڭ اسكەري قىزمەتشىلەرىمىزدى دايارلاۋ ساپاسىن اتاپ وتكەن قازاقستان قورعانىس ءمينيسترىنىڭ ءبىرىنشى ورىنباسارى اسكەري وقۋ ورىندارىنىڭ پروفەسسورلىق-وقىتۋشىلار قۇرامىمەن ءوزارا الماسۋدى ۇيىمداستىرۋ مۇمكىندىگىن قاراستىرۋدى ۇسىندى.
كەزدەسۋدە قازاقستان قارۋلى كۇشتەرى قولباسشىلىعىنىڭ وكىلى ۇلى وتان سوعىسىنداعى جەڭىستىڭ 80 جىلدىعىنا جانە كەڭەس وداعىنىڭ باتىرى ءاليا مولداعۇلوۆانىڭ 100 جىلدىعىنا ارنالعان ءىس-شارالار تۋرالى حاباردار ەتتى. گەنەرال-لەيتەنانت سۇلتان كامالەتدينوۆ بەلارۋس سۋۆوروۆشىلارىنىڭ جاقسى دايىندىعىن اتاپ ءوتىپ، ولاردى 2025 جىلى «ايبىن» اسكەري-پاتريوتتىق جيىنىنا قاتىسۋعا شاقىردى.
تاراپتار جاۋىنگەرلىك، كادرلىق جانە بىتىمگەرلىك دايىندىق جەلىسى بويىنشا ءوزارا ءتيىمدى ىنتىماقتاستىقتى نىعايتۋعا قىزىعۋشىلىق ءبىلدىردى.