ىشكى ىستەر مينيسترلىگى پوليسەيلەردى ماراپاتتادى
ىشكى ىستەر مينيسترلىگىندە وتان قورعاۋشىلار كۇنى مەن ۇلى جەڭىستىڭ 77 جىلدىعىنا وراي ءمىنسىز قىزمەتىمەن ەرەكشەلەنگەن پوليسەيلەر مەن ۇلتتىق ۇلاننىڭ اسكەري قىزمەتشىلەرى ماراپاتتالدى، دەپ حابارلايدى Almaty-akshamy.kz Almaty.tv سايتىنا سىلتەمە جاساپ.
بۇل كۇنى قازاقستان رەسپۋبليكاسى پرەزيدەنتىنىڭ جارلىعىمەن ىشكى ىستەر ورگاندارىنىڭ 25 قىزمەتكەرى مەملەكەتتىك ناگرادامەن ماراپاتتالدى، سەگىز باسشى جوعارى اتاق – گەنەرال شەنىن الدى.
سونداي-اق ىشكى ىستەر ءمينيسترىنىڭ بۇيرىعىمەن 820 قىزمەتكەر ءتۇرلى ماراپاتقا يە بولدى.
ماراپاتقا يە بولعانداردىڭ قاتارىندا ەر ادامدى اجالدان امان الىپ قالعان پاۆلودارلىق پوليسيا قىزمەتكەرلەرى دانات كامالييەۆ پەن باقىتجان مۇحامبەتوۆ تە بار. قىزمەت بارىسىندا قاۋىپكە باس تىككەن قوس جىگىتكە "ەرلىگى ءۇشىن" مەدالى تابىستالدى.
شاراعا مارقۇم ولجاس رىسبەكتىڭ اتا-اناسى ارنايى شاقىرتىلدى. كامەلەتكە تولماعاندار ءىسى جونىندەگى ۋچاسكەلىك پوليسيا ينسپەكتورى ولجاس ءقاۋىپتىڭ الدىن الۋ ءۇشىن كولىكتى توقتاتپاق بولىپ، قىزمەت بارىسىندا قازا تاپتى. ونىڭ اتا-اناسىنا ءىى دارەجەلى "ايبىن" وردەنى تابىستالدى.