ونەركاسىپ جانە قۇرىلىس مينيسترلىگى ەلدەگى سيرەك مەتالدار تۋرالى مالىمەتتەردى قۇپيا دەرەكتەر تىزىمىنەن شىعارۋدى ۇسىنىپ وتىر.
ۆەدومستۆو ماماندارىنىڭ پايىمىنشا، بۇل شارا ەلگە كەلەتىن ينۆەستيسيانى مولايتىپ، تىڭ وندىرىستەردى اشۋعا مۇمكىندىك بەرەدى، دەپ حابارلايدى Almaty-akshamy.kz Kazinform.kz-كە سىلتەمە جاساپ.
اتالعان ۇسىنىس مينيسترلىك ازىرلەگەن «سيرەك جانە جەردە سيرەك كەزدەسەتىن مەتالدار سالاسىن دامىتۋدىڭ 2024-2028 جىلدارعا ارنالعان كەشەندى جوسپارى» جوباسىندا كورىنىس تاپقان.
«كەيبىر سيرەك مەتالدار مەن بارلىق سيرەك جەر مەتالىنىڭ بالانستىق قورى تۋرالى مالىمەتتەردى مەملەكەتتىك قۇپيالارعا جاتقىزۋ سالاعا ينۆەستيسيا تارتۋ پروسەسىنە تەرىس اسەر ەتەدى. بۇل اقپارات الەۋەتتى ينۆەستورلار ءۇشىن قولجەتىمدى بولۋى قاجەت. 2021 جىلعى تاجىريبە كورسەتكەندەي، ءبىرقاتار سيرەك مەتالدىڭ بالانستىق قورىن، سونىڭ ىشىندە ءليتييدى قۇپياسىزداندىرۋ وسى سالاعا ينۆەستيسيا تارتۋعا مۇمكىندىك بەردى. ناتيجەسىندە جەر قويناۋىن پايدالانۋشى قازاقستاندىق ەكى كاسىپورىن نەمىس كومپانياسىمەن ليتيي كەن ورىندارىندا گەولوگيالىق بارلاۋ جۇمىستارىن جۇرگىزۋگە شارتتار جاساستى»، - دەپ جازىلعان اشىق نقا سايتىندا جاريالانعان كەشەندى جوسپار جوباسىندا.
وسىلايشا مينيسترلىك وكىلدەرى سيرەك مەتالدىڭ جەكەلەگەن تۇرلەرىنەن قۇپيالىلىق رەجيمىن الىپ تاستاۋدى ۇسىنىپ وتىر.
جوسپار جوباسىندا بۇل شارا 2024-2025 جىلدارى ادىلەت مينيسترلىگى مەن ۇلتتىق قاۋىپسىزدىك قىزمەتىنىڭ ماقۇلداۋى نەگىزىندە شەشىمىن تابۋى كەرەكتىگى ايتىلعان.
قازاقستاننىڭ جەر قويناۋىندا ۆولفرام، موليبدەن، بەريلليي، سيركونيي، گافنيي، نيوبيي، تانتال، ۆيسمۋت، ليتيي، سەزيي جانە رەنيي سياقتى سيرەك مەتالداردىڭ قورى، سونداي-اق «سيرەك جەر مەتالى» دەيتىن ساناتقا جاتاتىن يتتريي، لانتان، سەريي، پرازەوديم، نەوديم، ساماريي، ەۋروپيي، گادولينيي قورى كەزدەسەدى.
ولاردىڭ ىشىندە ينۆەستورلار ءۇشىن ەڭ تارتىمدىسى مىنالار:
- ۆاناديي قورى (قۇرىمساق، بالا-ساۋىسقاندىق)؛
- تيتان جانە سيركونيي (قاراوتكەل، وبۋحوۆسكايا، شوقاش، شپاكوۆكا، قۇمكول، سابىندىكول، پروگنوزنوە، گوركوۆسكوە، بەرەزوۆسكوە، زاياچيا، درۋجبا، اقەسپە)؛
- تانتال مەن نيوبيي ( جوعارعى ىرعىز، كۆارسيەۆوە، جوعارعى-بايمۋرزين، قالاي-تاپقان)؛
- ليتيي بويىنشا (يۋبيلەينوە، جوعارعى-بايمۋرزين، باكەن، بەلوگورسك، احمەتكينو، مەدۆەدكا)؛
- موليبدەن جانە ۆولفرام (كوكتەنكول، دروجيللوۆسكوە، جوعارعى قايراقتى، سميرنوۆسكوە، وڭتۇستىك جاۋىر، جانەت، باتىستاۋ، اقشاتا، قاراوبا، باينازار)؛
- بەريلليي (نۇراتالدى، دارات).