وتكەن جىلى الەۋمەتتىك ماڭىزى بار قالالىق اۆتوبۋس مارشرۋتتارىن سۋبسيديالاۋعا شامامەن 216 ملرد تەڭگە بولىنسە، بيىل بۇل ماقساتتا 242 ملرد تەڭگە ءبولۋ جوسپارلانىپ وتىر
بۇگىن ق ر كولىك مينيسترلىگىنىڭ باسشىسى مارات قارابايەۆتىڭ توراعالىعىمەن مينيسترلىك عيماراتىندا جولاۋشىلاردى قوعامدىق كولىكپەن تاسىمالداۋ ماسەلەلەرى بويىنشا كەڭەس ءوتتى، دەپ حابارلايدى Almaty-akshamy.kz كولىك مينيسترلىگىنە سىلتەمە جاساپ.
اشىق تالقىلاۋ فورماتىندا وتكەن وتىرىس بارىسىندا قالالىق مارشرۋتتاردى سۋبسيديالاۋ، اۆتوبۋس پاركىن جاڭارتۋ، تاريفتىك كوميسسيالاردىڭ جۇمىسى جانە تاريفتەردى بەلگىلەۋ، ەلەكتروندىق بيلەتتەۋ جۇيەسىنە قاتىستى ماسەلەلەر قاراستىرىلدى. كەزدەسۋگە مينيسترلىكتىڭ، ورتالىق مەملەكەتتىك جانە جەرگىلىكتى اتقارۋشى ورگانداردىڭ، ۇكىمەتتىك ەمەس ۇيىمدار، زاڭدى تۇلعالار بىرلەستىگى، ونەركاسىپتى دامىتۋ قورىنىڭ وكىلدەرى، اۆتوبۋس شىعاراتىن زاۋىتتار مەن تاسىمالداۋشىلار قاتىستى.
كەزدەسۋ بارىسىندا اۆتوبۋس جۇرگىزۋشىلەرىنىڭ تاپشىلىعى ماسەلەسىنە دە قاتىستى سۇراقتار تالقىلاندى. ماسەلەن، اقمولا وبلىسىندا جولاۋشىلاردى تاسىمالداۋعا نەگىزىنەن زەينەت جاسىنا جەتكەن جۇرگىزۋشىلەر تارتىلعان ەكەن. وسىعان ۇقساس ماسەلە ەلدىڭ بارلىق دەرلىك ايماقتارىندا بار. تاسىمالداۋشىلار D ساناتىنداعى جۇرگىزۋشى كۋالىگىن الۋ ءۇشىن جاس شەگىن تومەندەتۋدى، سونداي-اق جۇرگىزۋشىدەن قوعامدىق كولىكتى باسقارۋعا رۇقسات بەرمەس بۇرىن شاعىن اۆتوبۋستا 3 جىلدىق تاجىريبەسىنىڭ بولۋىن تالاپ ەتەتىن نورمانى الىپ تاستاۋدى سۇرايدى.
ءسوز كەزەگىندە كەڭەسكە قاتىسۋشىلار ۆەدومستۆو باسشىسىنا وزەكتى ماسەلەلەردى شەشۋ بارىسىندا ۇيىمداستىرىلعان اشىق اڭگىمە ءۇشىن ريزاشىلىقتارىن ءبىلدىردى. كەڭەستى قورىتىندىلاي كەلە، مارات كارىمجان ۇلى كەلىپ تۇسكەن ۇسىنىستاردى تاعى ءبىر مارتە پىسىقتاۋدى سۇراپ، اتالعان ماسەلەلەر الداعى ۋاقىتتا ءجىتى زەردەلەنەتىنىن ايتىپ جەتكىزدى. ءىس-شاراعا قاتىسۋشىلار بيىل اقپان ايىنىڭ سوڭىندا قايتا كەزدەسۋ تۋرالى ۋاعدالاستى.