McDonald's-تىڭ رەسەيدەن كەتۋىنە بايلانىستى شيكىزاتتى جەتكىزۋدە ماسەلە تۋىنداعان.
اۋىل شارۋاشىلىعى مينيسترلىگى وكىلدەرى McDonald's مەيرامحانالارى جابىلۋىنا قاتىستى پىكىر ءبىلدىردى، دەپ حابارلايدى Almaty-akshamy.kz اۋىل شارۋاشىلىعى مينيسترلىگىنىڭ باسپا ءسوز قىزمەتىنە سىلتەمە جاساپ.
ۆەدومستۆو مالىمەتىنشە، McDonald's مەيرامحانالار جەلىسى رەسەيلىك ەت ونىمدەرى جانە جارتىلاي فابريكاتتارمەن قامتاماسىز ەتىلگەن. ءبىراق McDonald's-تىڭ رەسەيدەن كەتۋىنە بايلانىستى شيكىزاتتى جەتكىزۋدە ماسەلە تۋىنداعان.
«شەتەلدىك كومپانيا وكىلدەرى كەلەشەكتە قازاقستاندىق ونىمگە كوشۋگە دايىن بولعان. الايدا وتاندىق وندىرۋشىلەردىڭ كومپانيانىڭ جوعارى ستاندارتتارىن ەنگىزۋى ءبىراز ۋاقىت الدى. McDonald's وكىلدەرىنىڭ ءوتىنىشى بويىنشا، جەرگىلىكتى شيكىزاتقا كوشكەنگە دەيىن قازاقستان ۇكىمەتى ەل اۋماعىنداعى مەيرامحانالار جەلىسىنىڭ جابىلۋىنا جول بەرمەۋ ءۇشىن ءۇشىنشى ەلدەردەن ءونىم جەتكىزۋ راسىمدەرىن جەدەلدەتۋگە دايىن بولدى. مۇددەلى مەملەكەتتىك ورگاندار وسى ماسەلە بويىنشا ءبىرقاتار كەڭەستەر وتكىزدى»، - دەلىنگەن مينيسترلىك حابارلاماسىندا.
مينيسترلىك مالىمەتىنشە، قازاقستاندىق ەت پەن ءسۇت ونىمدەرىن كومپانيا تالاپتارىنا سايكەستەندىرۋ بويىنشا جۇمىس باستالعان.
«قازىرگى ۋاقىتتا قازاقستاندىق ەت جانە ءسۇت ونىمدەرىن وندىرۋشىلەر ءوندىرىستى McDonald's تالاپتارىنا سايكەستەندىرۋ جۇمىستارىن باستادى. 2023 جىلدىڭ باسىندا كاسىپورىنداردىڭ ءاۋديتى بويىنشا جۇمىستار جوسپارلانعان بولاتىن. الايدا McDonald's-تىڭ جابىلۋىنا بايلانىستى جوسپارلانعان اۋديت بولعان جوق»، - دەلىنگەن حابارلامادا.
بۇل كومپانياعا شيكىزات نەمەسە جارتىلاي فابريكاتتار جەتكىزۋشىسى بولۋ ءۇشىن ارنايى سەرتيفيكاتتاۋدان ءوتۋ كەرەك، بۇل بۇكىل ءوندىرىس تىزبەگىنە قاتاڭ تالاپتار قويىلاتىنىن بىلدىرەدى. وعان مال ازىعىنان باستاپ قاپتاماعا دەيىنگى ارالىق كىرەدى. الايدا مينيسترلىك مالىمەتىنشە، بۇل جاعدايدا كومپانيانىڭ بەلگىلى ءبىر جەتكىزۋشىنى تاڭدايتىنىنا كەپىلدىك جوق.
ەسكە سالايىق، بۇعان دەيىن قازاقستاندا McDonald’s مەيرامحانالارى جۇمىسىن توقتاتقانى تۋرالى ايتىلدى.