مينيسترلەردىڭ حالىقپەن كەزدەسۋىنىڭ كەستەسى بەكىتىلدى

مينيسترلەر كەزدەسۋ قورىتىندىسى بويىنشا ۇكىمەتكە ەسەپ بەرەدى

ق ر پرەمەر-مينيسترى ءاليحان سمايىلوۆ ورتالىق اتقارۋشى ورگاندار باسشىلارىنىڭ حالىقپەن كەزدەسۋىنىڭ 2022 جىلعا ارنالعان كەستەسى بەكىتىلگەن ق ر ۇكىمەتىنىڭ قاۋلىسىنا قول قويدى. بۇل تۋرالى Almaty-akshamy.kz ۇكىمەت باسشىسىنىڭ باسپا ءسوز قىزمەتىنە سىلتەمە جاساپ حابارلايدى.

ەسكە سالا كەتەيىك، بۇعان دەيىن مەملەكەت باسشىسى قاسىم-جومارت توقايەۆ ۇكىمەت مۇشەلەرىنە وڭىرلەرگە بارىپ ەسەپ بەرۋدى، قازاقستاندىقتاردى ەلىمىزدە جۇرگىزىلىپ جاتقان رەفورمالار تۋرالى حاباردار ەتۋدى، اتقارۋشى ورگانداردىڭ ەل تۇرعىندارى الدىندا ەسەپ بەرۋى مەن جاۋاپكەرشىلىگىن كۇشەيتۋدى، حالىقتى مەملەكەتتىك باسقارۋ پروسەسىنە كەڭىنەن تارتۋدى تاپسىرعان بولاتىن.

اتالعان كەزدەسۋلەر كەزىندە مينيسترلەر ءوز سالاسى بويىنشا ازاماتتاردى جەكە قابىلدايدى. ءبىرىنشى كەزەكتە جەرگىلىكتى دەڭگەيدە شەشىمىن تاپپاعان جانە ۆەدومستۆوارالىق تاسىلدەردى قولدانۋدى تالاپ ەتەتىن پروبلەمالىق ماسەلەلەر قارالادى.
نەگىزگى جاڭالىق – كەزدەسۋدىڭ كەمىندە 75%-ى «سۇراق-جاۋاپ» فورماتىندا وتەدى.

مينيسترلەر كەزدەسۋلەردىڭ قورىتىندىسى مەن حالىقتىڭ پروبلەمالىق ماسەلەلەرى بويىنشا قابىلدانعان شەشىمدەر تۋرالى ۇكىمەتتە ەسەپ بەرۋى ءتيىس.

ورتالىق مەملەكەتتىك ورگاندار باسشىلارىنىڭ كەزدەسۋ كەستەسىمەن تولىعىراق سىلتەمە ارقىلى تانىسۋعا بولادى.