مينيستر تۇرعىمبايەۆ الماتىداعى اتىس كەزىندە قازا تاپقانداردىڭ وتباسىلارىنا كوڭىل ايتتى

ءبىز ءۇشىن بۇگىن وتە اۋىر كۇن، ورنى تولماس قايعى.

قازاقستاننىڭ ىشكى ىستەر ءمينيسترى ەرلان تۇرعىمبايەۆ الماتىداعى اتىس كەزىندە قازا تاپقانداردىڭ وتباسىلارىنا كوڭىل ايتتى،دەپ حابارلايدى Almaty-akshamy.kz. 

كوڭىل ايتۋ سوزدەرى باس پوليسەيدىڭ Facebook الەۋمەتتىك جەلىسىندەگى جەكە پاراقشاسىندا جاريالاندى. 

«ءبىز ءۇشىن بۇگىن وتە اۋىر كۇن، ورنى تولماس قايعى. ايدىڭ-كۇننىڭ امانىندا الماتى قالاسىنداعى قايعىلى وقيعا ناتيجەسىندە 5 ازاماتىمىز وققا ۇشتى. ونىڭ ىشىندە ىشكى ىستەر ورگاندارىنىڭ ەكى قىزمەتكەرى بار. پوليسيا مايورى دارحان سۇلەيەۆ پەن پوليسيا كاپيتانى نۇربول بايعازييەۆ ءوز جۇمىستارىن ادال اتقارىپ جۇرگەن قاتارداعى قىزمەتكەرلەر ەدى. قازاقتىڭ داڭقتى باتىرى باۋىرجان مومىش ۇلىنىڭ “ادام بولۋ – قاسيەت، ازامات بولۋ – مىندەت، پاتريوت بولۋ – پارىز” دەگەن قاناتتى ءسوزى بار. ولار ادامگەرشىلىكتەرىمەن اينالاسىنا ابىرويلى بولىپ، وتانسۇيگىشتىكتەرىمەن تالايعا ۇلگى بولا ءبىلدى. ادام رەتىندە قالىپتاستى، ازامات بولىپ اتقا قوندى، پاتريوتتىق بولمىسىمەن ەل تىنىشتىعىن قورعادى. دارحان سۇلەيەۆ ىشكى ىستەر سالاسىندا 18  جىل قىزمەت اتقارسا، نۇربول بايعازييەۆ 7 جىلدان بەرى ساپتا قىزمەت ەتىپ كەلدى. ولاردى ارىپتەستەرى قىزمەتىنە ادال، دوستىققا بەرىك، جۇرەگى ۇلكەن ازامات رەتىندە ماڭگى ەستە ساقتايدى. وسى مارقۇمداردىڭ اكە-شەشەسى، وتباسى، تۋعان-تۋىستارىنا كوڭىل ايتىپ، قايعىلارىنا ورتاقتاسقىم كەلەدى. مارقۇمداردىڭ جانى ءجانناتتا، توپىراعى تورقا، يمانى جولداس بولسىن!»، – دەپ جازدى مينيستر.