ق ر مادەنيەت جانە سپورت ءمينيسترى اقتوتى رايىمقۇلوۆا Facebook-تەگى پاراقشاسىندا وتانداستارىن قازاقستان رەسپۋبليكاسىنىڭ سپورت كۇنى مەرەكەسىمەن قۇتتىقتادى، دەپ حابارلايدى Almaty-akshamy.kz.
«قۇرمەتتى دوستار! ارداقتى اعايىن! سىزدەردى تامىزدىڭ ءۇشىنشى جەكسەنبىسى قازاقستان رەسپۋبليكاسىنىڭ سپورت كۇنى مەرەكەسىمەن ىزگى نيەتپەن قۇتتىقتايمىن! بۇل مەرەكە ەلىمىزدە 2003 جىلى 15 قاراشاداعى تۇڭعىش پرەزيدەنت – ەلباسى نۇرسۇلتان نازاربايەۆتىڭ جارلىعىنا سايكەس اتاپ وتىلۋدە. سپورت – دەنساۋلىق كەپىلى. كەمەسىن الىسقا باعىتتاپ بارا جاتقان مەملەكەتىمىز بۇل بايلىقتى كوزدىڭ قاراشىعىنداي ساقتاپ، نىعايتۋعا شەكاراسىن شەگەندەگەن كەزدەن باستاپ ەرەكشە زەيىن قويىپ كەلەدى. ەل تۇرعىندارىنىڭ اراسىندا سالاۋاتتى ءومىر سالتىن ناسيحاتتاپ، بۇقارالىق سپورتقا دەگەن قىزىعۋشىلىعىن ارتتىرۋ – مەملەكەتىمىزدىڭ ستراتەگيالىق باسىم باعىتىنىڭ ءبىرى»، - دەدى مينيستر.
ءمينيستردىڭ سوزىنشە، مادەنيەت جانە سپورت مينيسترلىگى بۇقارالىق سپورتتى دامىتۋ ماقساتىندا ءبىرقاتار باعدارلامانى قولعا الىپ، ارنايى زاڭ جوبالارىنا ءتيىستى وزگەرىستەر ەنگىزىپ جاتىر.
«ءبىز دەنساۋلىقتىڭ ءقادىرىن جەتە ءتۇسىنىپ، ونى باستى بايلىققا بالاعان حالىقتىڭ ۇرپاعىمىز. بۇگىندە «شىنىقساڭ – شىمىر بولاسىڭ»، دەگەن ونەگەلى ءسوزدى ەستە ۇستاپ، سپورتتى كۇندەلىكتى ءومىرىنىڭ اجىراماس ءبىر بولىگىنە اينالدىرىپ ۇلگەرگەن ازاماتتارىمىزدىڭ قاتارى ارتىپ كەلە جاتقانى قۋانتادى. مادەنيەت جانە سپورت مينيسترلىگى بۇقارالىق سپورتتى دامىتۋ ماقساتىندا ءبىرقاتار باعدارلامانى قولعا الىپ، ارنايى زاڭ جوبالارىنا ءتيىستى وزگەرىستەر ەنگىزىپ جاتىر. بۇگىنگى ءساتتى پايدالانا وتىرىپ، ءبارىڭىزدى سپورت اتتى سيقىردىڭ سوڭىنان ەرىپ، الەمدىك قوزعالىستىڭ قاتارىنا قوسىلۋعا شاقىرعىم كەلەدى. ءدۇبىرلى دودالاردا ەل نامىسىن قورعايتىن كاسىپقوي سپورتشىلارىمىزعا مۇقالماس ەرىك-جىگەر مەن تاۋسىلماس كۇش-قۋات تىلەيمىن. لايىم وتانداستارىمىزدىڭ اسىعى الشىسىنان ءتۇسىپ، كوك تۋىمىز بيىكتە جەلبىرەي بەرسىن. ءاردايىم حالقىمىزدىڭ دەنى ساۋ، ويى سەرگەك بولسىن!»، - دەدى رايىمقۇلوۆا.