"زاۋىتتىڭ وزىندە قانت 350 تەڭگە تۇرادى".
اۋىل شارۋاشىلىعى ءمينيسترى ايداربەك ساپاروۆ قانتتىڭ باعاسىنا باقىلاۋدا ۇستاۋعا ۋادە بەرىپ، الىپساتارلارعا ەسكەرتۋ جاسادى، دەپ حابارلايدى aqshamnews.kz
بىلتىر قازاقستاندا قانت قىزىلشاسىنىڭ رەكوردتىق كولەمى جينالعان بولاتىن. سونىڭ ارقاسىندا قانت ءوندىرۋ كولەمى ءوستى.
"بيىل ءبىز 128 مىڭ توننا قانت وندىردىك. ءقازىر 30-40 پروسەنتى ساتىلعان شىعار. ال قالعانى قويمالاردا جاتىر، بارىنە جەتەدى. دەگەنمەن باعانى باقىلاپ وتىرۋ كەرەك. وسى جايىندا ساۋدا مينيسترىمەن دە سويلەستىك. بۇگىندە جۇمىس توبى بار. باعانى باقىلاۋدا ۇستايتىن بولامىز"، - دەدى ساپاروۆ.
ونىڭ ايتۋىنشا، باعانى الىپساتارلار كوتەرەدى. ال زاۋىتتىڭ وزىنەن قانتتىڭ ءبىر كەلىسى 350-380 تەڭگەگە ساتىلادى.
"مەندە ستاتيستيكا بار. وعان سايكەس، دۇكەندەردە قانت 400-420 تەڭگەدەن ساتىلادى. بۇل – رەسپۋبليكا بويىنشا ورتاشا باعانىڭ كورسەتكىشى. ءبىز قانتتىڭ باعاسىن تاعى قارايمىز. شەكتى باعا بار، وعان قوسىلاتىن ۇستەمە بار. ونىڭ مولشەرى 15 پروسەنتتەن اسپاۋى قاجەت. ودان اسىپ كەتسە، ساۋدا ورىندارىنا ايىپپۇل سالاتىن بولامىز"، - دەدى مينيستر.