ءبىرىڭعاي تولەم 2023 جىلدان باستاپ ەنگىزىلەدى.
ۇلتتىق ەكونوميكا ءمينيسترى الىبەك قۋانتىروۆ بيزنەس ءۇشىن ءبىرىڭعاي تولەم ەنگىزىلەتىنىن ايتتى، دەپ حابارلايدى Almaty-akshamy.kz
ونىڭ ايتۋىنشا، مەملەكەت باسشىسى قاسىم-جومارت توقايەۆ بىلتىرعى جولداۋىندا ميكرو جانە شاعىن بيزنەس ءۇشىن ەڭبەكاقى تولەۋ قورىنان الىناتىن ءبىرىڭعاي تولەمدى ەنگىزۋدى تاپسىرعان. وسىلايشا، قازىرگى بارلىق تولەم – زەينەتاقى، تابىس سالىعى جانە الەۋمەتتىك ساقتاندىرۋ جارناسى ءبىر تولەممەن جاسالۋى كەرەك. ناتيجەسىندە كاسىپكەرلەر ارتىق جۇمىس ىستەمەيدى، جۇمىسشىلاردىڭ اۋدارىمىن ءبىرىڭعاي تولەممەن جۇرگىزەدى.
«الەۋمەتتىك اۋدارىمدار مولشەرى قىزمەتكەرلەرگە تولەنەتىن بولاشاق تولەمگە اسەر ەتەتىندىكتەن، جۇكتەمەنى جەكە تابىس سالىعى ەسەبىنەن تومەندەتۋ كوزدەلىپ وتىر. ءبىرىڭعاي مولشەرلەمە مىندەتتى زەينەتاقى جارنالارىن ەنگىزۋدى جانە الەۋمەتتىك اۋدارىمدار مولشەرلەمەسىنىڭ ءوسۋىن ەسكەرەدى»، - دەدى الىبەك قۋانتىروۆ.
ءبىرىڭعاي تولەمدى ميكرو جانە شاعىن بيزنەس سۋبەكتىلەرى ەرىكتى نەگىزدە قولدانادى. تولەم سوماسى ءبىرىڭعاي جيىنتىق تولەمگە ۇقساس بولادى.
«ناتيجەسىندە ءبىرىڭعاي تولەم سالىقتار مەن ەڭبەكاقى تولەمدەرىن ەسەپتەۋدى جەڭىلدەتىپ قانا قويماي، سالىق جۇكتەمەسىن ازايتۋعا دا مۇمكىندىك بەرەدى»، - دەدى مينيستر.
ءبىرىڭعاي تولەمدى ەنگىزۋ ءۇشىن مينيسترلىك ارنايى زاڭ جوباسىن ازىرلەدى. ءماجىلىس دەپۋتاتتارى قۇجاتتى ءبىرىنشى وقىلىمدا ماقۇلدادى.