توتەنشە جاعدايلار ءمينيسترى مينيسترلىكتىڭ قۇرىلىمدىق بولىمشەلەرىنىڭ باسشىلارى قۇرامىمەن الماتى قالاسىنا جۇمىس ساپارىمەن كەلدى.
ساپار بارىسىندا اقساي وزەنىنىڭ باسسەينىندەگى سەلدەن قورعاۋ قۇرىلىسى تەكسەرىلدى، رەسپۋبليكالىق جەدەل-قۇتقارۋ جاساعىنىڭ ورتالىق بازاسىندا بولدى، وندا تجم باسشىلىعىنا كينولوگيالىق ەسەپتورتارى، اۆاريالىق-قۇتقارۋ تەحنيكاسى مەن جابدىقتارى كورسەتىلدى، دەپ حابارلايدى Almaty-akshamy.kz cالا مينيسترلىگىنە سىلتەمە جاساپ.
سول كۇنى «تىكۇشاق ايلاعى» پوليگونىنىڭ اۋماعىندا ۆەدومستۆو باسشىسى تج-نى جويۋ جونىندەگى جەدەل قالالىق شتابتىڭ جۇمىسىن ورىستەتۋدى، مەگاپوليستىڭ ازاماتتىق قورعاۋ قىزمەتتەرىنىڭ، تجم ازاماتتىق قورعانىس پولكىنىڭ كۇشتەرى مەن قۇرالدارىنىڭ دايىندىعىن، بولىمشەلەر اراسىنداعى بايلانىستىڭ ۇيىمداستىرىلۋىن تەكسەردى.
پوليگون بازاسىندا شارتتى تۇردە باسپاناسىز قالعان حالىققا ارنالعان شاتىرلى لاگەر، تجم اپاتتار مەديسيناسى ورتالىعىنىڭ جىلجىمالى گوسپيتالى، مەديسينالىق كومەك كورسەتۋ ءۇشىن 109 قۇتقارۋ قىزمەتى ورنالاستىرىلدى.
ءارى قاراي، ولاردىڭ ماتەريالدىق-تەحنيكالىق جاعدايىمەن تانىسۋ ءۇشىن مەگاپوليستىڭ ءورت ءسوندىرۋ بولىمشەلەرىنە باردى. جۇمىس ساپارىنىڭ سوڭىندا الاتاۋ اۋدانىن قورعاۋدى قامتاماسىز ەتەتىن رىسقۇلوۆ داڭعىلى بويىنداعى جوندەۋدەن وتكەن مامانداندىرىلعان جاساققا باردى.
قازىرگى ۋاقىتتا مەگاپوليستىڭ ورتتەن قورعالۋىن 20 ءورت ءسوندىرۋ بولىمشەسى قامتاماسىز ەتەدى. ءورت قاۋىپسىزدىگىن نىعايتۋ جانە تۋىنداعان تج-عا ۋاقتىلى دەن قويۋ ماقساتىندا تولىق قامتىلۋ ءۇشىن تاعى 15 ءورت دەپوسى سالۋىنۋى قاجەت.
ايتا كەتەيىك، الماتى قالاسىن دامىتۋدىڭ 2025 جىلعا دەيىنگى باعدارلاماسى بويىنشا بيىلعى جىلى مەگاپوليستىڭ تۇركسىب (شىعىس قاقپاسى ش/ا)، ناۋرىزباي (شۇعىلا ش/ا.) جانە ناۋرىزباي اۋداندارىندا (قاراعايلى ش/ا.) تاعى 3 ءورت ءسوندىرۋ دەپوسىن سالۋ كوزدەلىپ وتىر.
مينيستر توتەنشە جاعدايلارعا ءتيىمدى دەن قويۋ جانە ولاردىڭ الدىن الۋ ماقساتىندا جەدەل قىزمەتتەر مەن جەرگىلىكتى اتقارۋشى ورگاندار اراسىنداعى ۇيلەسىمدى جۇمىستىڭ باسىمدىعىنا نازار اۋدارا وتىرىپ، ءبىرقاتار ناقتى تاپسىرمالاردى بەلگىلەدى.