فۋتبولدان قازاقستان قۇراماسى گرەكيادان وڭباي جەڭىلدى.
جازدا گەرمانيادا وتەتىن ەۋروپا چەمپيوناتىنا قاتىسامىز با دەگەن ارمان ارمان كۇيىندە قالدى دەپ حابارلايدى Almaty-akshamy.kz.
Prosports.kzء-تىڭ مالىمەتىنەجۇگىنسەك، افينادا ازۋلى گرەكيادان ءىرى ەسەپپەن ۇتىلدىق. باس باپكەر ماگومەد ادييەۆتىڭ قازاقستان قۇراماسىن وسى دەڭگەيگە جەتكىزگەنىنە داۋ جوق. ءبىراق، گرەكيا جەرىندەگى ماچتا قارسىلاس ويلاماعان ءجۇرىس جاسايمىن دەپ قارسىلاسىن شارۋاسىن جەڭىلدەتكەنى ءىشتى قىنجىلتادى.
باستاپقى قۇرام ءتىزىمىن كورگەندە بىرنەشە سۇراق تۋىندادى. ورتانى ابزال بەيسەبەكوۆ، باكتيەر زاينۋتدينوۆ ەكەۋىنە تاپسىرعانى تاڭدانىس تۋدىردى. العى شەپتە ماكسيم سامورودوۆ پەن يسلام چەسناكوۆقا كۇمان جوق، ءبىراق ەلحان استانوۆتى شابۋىلداعى ءۇشىنشى فۋتبولشى پوزيسياسىنا شىعارعانى دا كوڭىلگە كۇمان كەلتىردى. ورتالىق قورعانىستىڭ سول قاپتالىنداعى نۇرالى ءالىپتى وڭ قاپتالدا عانا ءوزىڭ جايلى سەزىنەتىن تەمىرلان ەرلانوۆپەن الماستىرۋدى ءجون كورىپتى. قانداي ماقساتپەن كاپيتان اسحات تاعىبەرگەندى، رامازان ورازوۆتى، يسلامبەك قۋاتتى قوسالقى قۇرامدا قالدىرعانىن ادييەۆ كەيىن تۇسىندىرە جاتار.
ادييەۆتەن «توسىن سىيلار» العان گرەكتەر العاشى ون بەس مينۋتتا ماچ تاعدىرىن شەشىپ تاستادى. يان ۆوروگوۆسكيي مەن ەرلانوۆتىڭ قاپتالىنان باستالعان شابۋىل وڭ قاپتالدا پەنلتيمەن اياقتالدى. كاپيتاندىق بەلگىمەن جۇرگەن ابزال بەيسەبەكوۆ ورتانى ۇستاي المادى. پاس بەرگەندە جاڭىلدى، قارسىلاس شابۋىلىن بۇزىپ جارىتپادى. ۇلتتىق قۇراماداعى ءقايبىر جەتىستىگى ءۇشىن ادييەۆ تىرەۋشى جارتىلاي قورعاۋشى پوزيسيانى بەرىپ قويعانى وزىڭە عانا ايان. ەكىنشى، ءۇشىنشى، ءتورتىنشى گولداردى قارسىلاس شاسكييدىڭ ايىپ الاڭىنىڭ ىشىنەن سوقتى دەسەك تە بولادى. ۇشەۋى دە سول قاپتالدان كەلدى.
ەكىنشى تايم باسىندا قوسالقى قۇرامنان شىققان رامازان ورازوۆ ارقاسىندا شابۋىلعا قان جۇرگىرگەندەي كورىنگەن. گول سوعامىز دەگەن ۇمتىلىس 10 مينۋتقا سوزىلدى. زاينۋتدينوۆ، تاپالوۆ جانە ورازوۆتىڭ سوققىلارى قاقپاعا دارىمادى. يان ۆوروگوۆسكيي 5-6 مەتر جەردەن قاقپانى ءدال كوزدەي المادى. 85ء-شى مينۋتتا گول سوقتىق. وعان دا جەتتىك. ءبىراق، ءوز قاقپامىزعا. ەركىن تاپالوۆ بۇرىشتامادان كەيىن دوپتى شاسكييدىڭ قاقپاسىنا باعىتتاپ جىبەردى.
ادييەۆ كاپيتان تاعىبەرگەندى افيناداعى ماچتا شىعارمايمىن دەپ الدەبىرەۋگە سەرت بەرگەن سەكىلدى. بابى كەلىسپەي تۇرسا دا اسحاتتىڭ ۇلتتىق قۇراماداعى ۇزدىك جارتىلاي قورعاۋشى ەكەنى ءسوزسىز. ىشكى بىرىنشىلىكتىڭ ەكى ماچىنا دا قاتىستى. جامان وينادى دەپ ايتا المايمىز. گول سوقپاعان شىعار. زەڭبىرەكتىڭ وعىنداي سوققىلارىن ازايتقان شىعار. ءبىراق، قپل-دا العاشقى تۋردا ەكى گول سوققان استانوۆ قانداي ونەرىمەن تاڭ-تاماشا قىلدى؟
ەۋروپا چەمپيوناتىنا قول سوزىم جەرگە دەيىن جەتىپ، بۇرىن تۇسىمىزگە دە كىرمەگەن ناتيجە ءۇشىن ادييەۆ باستاعان كومانداعا العىس شەكسىز. دانيا ءۇشىن، فينليانديا ءۇشىن، توپتاعى ءۇشىنشى ورىن ءۇشىن راحمەت! ۇلتتار ليگاسىنداعى ءبىرىنشى ورىننىڭ ورىنى ءبىر بولەك. دەسە دە، بۇگىن ماچتاعى تاكتيكاسىنا قاراپ سىناۋ ورىندى دەپ تاپتىق. سىننان ساباق الىپ، ۇلتتىق قۇرامانىڭ الدا الار اسۋى بار ەكەنىنە، بۇدان دا جوعارى بيىكتىكتى باعىندىرارىنا ءبىز سەنبەيمىز ەمەس، سەنەمىز!
ەندى، گرەكيا ۇلتتىق قۇراماسى فينالدا گرۋزيامەن ەۋروپا چەمپيوناتىنىڭ جولداماسىن ساراپقا سالادى. قازاقستان گرۋزيادان 0:2 ەسەبىمەن ۇتىلعان ليۋكسەمبۋرگپەن جولداستىق ماچ وتكىزەدى.
ۇلتتار ليگاسى. جارتىلاي فينال
گرەكيا - قازاقستان - 5:0(4:0)
گول سوققاندار: باكاسەتاس، 9 - پەنالتيدەن (1:0)؛ پەلكاس، 15 (2:0)؛ يواننيديس، 37 (3:0)؛ كۋربەليس، 40 (4:0)؛ تاپالوۆ، 86 - ءوز قاقپاسىنا (5:0)
گرەكيا: ۆلاحوديموس، بولدوك، ماۆروپانوس، سيميكاس، باكاسەتاس، كۋربەليس، مادالوس، حاسيدياكوس، ماسۋراس، ياننيديس، پەلكاس؛
قازاقستان: شاسكيي، ۆوروگوۆسكيي، ەرلانوۆ، ماروچكين، بىستروۆ، قايىروۆ، استانوۆ، زاينۋتدينوۆ، بەيسەبەكوۆ، چەسنوكوۆ، سامورودوۆ.
ەستەرىڭىزگە سالا كەتەيىك، كەشە Freedom Holding Corp كومپانياسىنىڭ باس ديرەكتورى تيمۋر تۋرلوۆ قازاقستان فۋتبول قۇراماسىنا ۇلتتار ليگاسىنىڭ جارتىلاي فينالدىق پلەي-وفف ماچىندا گرەكيا قۇراماسىن جەڭەتىن بولسا، 100 ميلليون تەڭگە سىياقى بەرەتىنىن حابارلاعان ەدىك.