مىندەتتى زەينەتاقى جارنالارى – جۇمىس بەرۋشى بجزق-داعى جەكە زەينەتاقى شوتىنا تولەيتىن اقشالاي ماندەگى ەڭبەكاقى مەن وزگە دە كىرىستەردىڭ بارلىق ءتۇرىنىڭ 10% بولىگى.
1 شىلدەدەن باستاپ ەلىمىزدە الەۋمەتتىك كودەكس ءوز كۇشىنە ەنۋىنە وراي مىندەتتى زەينەتاقى جارناسىن تولەيتىندەرگە قاتىستى ءتارتىپ تە وزگەرمەك، دەپ حابارلايدى Almaty-akshamy.kz بجزق باسپا ءسوز قىزمەتىنە سىلتەمە جاساپ.
بۇل ەرەجە ەڭبەك شارتى بويىنشا دا، زاڭدى تۇلعامەن جاسالعان ازاماتتىق-قۇقىقتىق سيپاتتاعى شارت بويىنشا دا قىزمەتكەرلەرگە قولدانىلادى.
2023 جىلعى 1 شىلدەگە دەيىن ازاماتتاردىڭ مىنا ساناتتارى بجزق-عا مزج تولەۋگە قۇقىلى، ءبىراق مىندەتتى ەمەس بولىپ كەلدى:
سالىق اگەنتتەرى سانالمايتىن جەكە تۇلعالارمەن جاسالعان، نىساناسى جۇمىستاردى ورىنداۋ (قىزمەتتەردى كورسەتۋ) بولىپ تابىلاتىن ازاماتتىق-قۇقىقتىق سيپاتتاعى شارتتار بويىنشا تابىس الاتىن، قازاقستان رەسپۋبليكاسىنىڭ اۋماعىندا تۇراقتى تۇراتىن جەكە تۇلعالار؛
قازاقستان رەسپۋبليكاسىنىڭ اۋماعىندا تۇراقتى تۇراتىن، قازاقستان رەسپۋبليكاسىنداعى حالىقارالىق ۇيىمداردىڭ وكىلدىكتەرىندە، قازاقستان رەسپۋبليكاسىندا اككرەديتتەلگەن شەت مەملەكەتتەردىڭ ديپلوماتيالىق وكىلدىكتەرىندە جانە كونسۋلدىق مەكەمەلەرىندە جۇمىس ىستەيتىن جەكە تۇلعالار.
2023 جىلعى 1 شىلدەدەن باستاپ جوعارىدا اتالعان بارلىق تۇلعالار بجزق-عا مزج تولەۋگە مىندەتتى بولادى.
مزج تولەۋ ەكىنشى دەڭگەيدەگى بانكتەر ارقىلى قولما-قول اقشامەن نە قولما-قول اقشاسىز تاسىلمەن مەملەكەتتىك كورپوراسيا ارقىلى جۇزەگە اسىرىلادى. ول ءوز كەزەگىندە ونى پايداسىنا وسى جارنالار اۋدارىلاتىن جەكە تۇلعالاردىڭ ءبىرىڭعاي تىزىمىنە سايكەس بجزق-عا اۋدارادى.
بۇل شارا حالىقتى بولاشاقتا لايىقتى تولەمدەرمەن قامتاماسىز ەتۋدى كوزدەيتىن جيناقتاۋشى زەينەتاقى جۇيەسىمەن قامتۋ اياسىن ۇلعايتۋعا ىقپال ەتەدى.