بيىل كوپ سالادا جالاقى ءوسىپ جاتىر، زەينەتاقى مەن جاردەماقى تولەمدەرىندە، مىندەتتى الەۋمەتتىك مەديسينالىق ساقتاندىرۋعا تولەنەتىن جارنالار مەن اۋدارىمدار مولشەرىندە دە وزگەرىستەر بار. سونداي-اق، مىندەتتى الەۋمەتتىك ساقتاندىرۋ جۇيەسىنە دە وسى قاڭتاردان باستاپ وزگەرىستەر ەنگىزىلدى.
مەملەكەتتىك الەۋمەتتىك ساقتاندىرۋ قورى جۇمىس ىستەيتىن ازاماتتاردى الەۋمەتتىك قورعاۋدىڭ قوسىمشا دەڭگەيىن جۇزەگە اسىراتىن تەتىك.
– مىندەتتى الەۋمەتتىك ساقتاندىرۋ جۇيەسىنىڭ قارجى رەسۋرستارى جۇمىس بەرۋشىلەردىڭ ءوز جۇمىسكەرلەرى ءۇشىن، سونداي-اق دارا كاسىپكەرلەر مەن جەكە پراكتيكامەن اينالىساتىن ادامداردىڭ وزدەرى ءۇشىن ەڭ تومەنگى ءبىر جالاقىدان كەم ەمەس جانە جەتى ەسەلەنگەن مولشەرىنەن اسپايتىن تابىستىڭ 3،5% مولشەرىندە تولەنەتىن الەۋمەتتىك اۋدارىمدارى ەسەبىنەن قالىپتاسادى.
2023 جىلدان باستاپ ەڭ تومەنگى جالاقىنىڭ 70 مىڭ تەڭگەگە دەيىن ارتاتىنىن ەسكەرە وتىرىپ، بيىلعى 1 قاڭتاردان باستاپ الەۋمەتتىك اۋدارىمداردىڭ ەڭ تومەنگى مولشەرى ايىنا 2450 تەڭگەنى (3،5%*70 000 تەڭگە)، ال ەڭ جوعارى مولشەرى 17 150 تەڭگەنى (3،5%*7*70 000 تەڭگە) قۇرايتىن بولادى. الەۋمەتتىك اۋدارىمداردىڭ ۋاقىتىلى ءتۇسۋى الەۋمەتتىك تاۋەكەلدەردىڭ 5 ءتۇرى – ەڭبەك ەتۋ قابىلەتىنەن ايىرىلۋى، اسىراۋشىسىنان ايىرىلۋى، جۇمىسىنان ايىرىلۋى، جۇكتىلىككە جانە بوسانۋعا، سونداي-اق بالا كۇتىمىنە بايلانىستى كىرىسىنەن ايىرىلۋى كەزىندە ازاماتتارعا الەۋمەتتىك تولەمدەر الۋدى قامتاماسىز ەتەدى، – دەيدى «مەملەكەتتىك الەۋمەتتىك ساقتاندىرۋ قورى» اق الماتى قالاسى بويىنشا فيليالىنىڭ ديرەكتورى ءلاززات ساعىنبەكوۆا.
2023 جىلعى 1 قاڭتاردان باستاپ الەۋمەتتىك تولەمدەردىڭ ەكى ءتۇرىنىڭ پارامەترلەرى وزگەرتىلەتىن بولادى. ءبىرىنشىسى - جۇمىسىنان ايىرىلۋى جاعدايىنا الەۋمەتتىك تولەم، ول جۇيەگە قاتىسۋشىعا جۇمىسسىز رەتىندە تىركەلگەن كۇننەن باستاپ ەڭبەك وتىلىنە بايلانىستى 1 ايدان 6 ايعا دەيىن تاعايىندالادى. الەۋمەتتىك تولەمنىڭ مولشەرى الەۋمەتتىك اۋدارىمدار جۇرگىزىلگەن جۇيەگە قاتىسۋشىنىڭ سوڭعى ەكى جىلداعى ورتاشا ايلىق كىرىسىنە، جۇيەگە قاتىسۋ وتىلىنە جانە كىرىستى اۋىستىرۋ كوەففيسيەنتىنە بايلانىستى بولادى. كەلەسى جىلدان باستاپ كىرىستى اۋىستىرۋ كوەففيسيەنتى 45%-عا دەيىن ارتادى، بۇل الەۋمەتتىك تولەم مولشەرىنىڭ ورتا ەسەپپەن 13%-عا وسۋىنە اكەلەدى. ايتا كەتۋ كەرەك، 2023 جىلعى 1 قاڭتارداعى جاعدايعا ناقتى تولەم الۋشىلارعا 45% كوەففيسيەنتى قولدانىلا وتىرىپ، ءبىرجولعى قايتا ەسەپتەۋ اۆتوماتتى تۇردە جۇرگىزىلەتىن بولادى. الماتى قالاسى بويىنشا 2080 الۋشىعا تولەم مولشەرى ۇلعايتىلدى.
ەكىنشىسى - بالا كۇتىمى بويىنشا الەۋمەتتىك تولەم بۇگىندە بالا ءبىر جاسقا تولعانعا دەيىن تاعايىندالاتىن بولسا، 2023 جىلعى 1 قاڭتاردان باستاپ تولەم ۇزاقتىعى 1،5 جاسقا دەيىن ۇزارتىلادى.
الەۋمەتتىك تولەمنىڭ مولشەرى سوڭعى ەكى جىلدا الەۋمەتتىك اۋدارىمدار جۇرگىزىلگەن ورتاشا ايلىق كىرىستىڭ 40%-ىن قۇرايدى.
2023 جىلدىڭ 1 قاڭتارىنداعى جاعداي بويىنشا، بالالارى 2022 جىلى تۋعان ناقتى الۋشىلارعا تولەم اۆتوماتتى تۇردە ۇزارتىلاتىن بولادى. الماتى قالاسى بويىنشا 25 365 الۋشىعا تولەم مەرزىمى 1،5 جاسقا دەيىن ۇزارتىلدى.
سونىمەن قاتار، اتاپ وتەتىن جاعداي جۇمىسكەر ءۇشىن الەۋمەتتىك اۋدارىمدار تۇسكەن جاعدايدا بازالىق مەملەكەتتىك جاردەماقىلارعا قوسىمشا قوردان ۇزاق مەرزىمدى الەۋمەتتىك تولەمنىڭ ەكى ءتۇرى تولەنەدى.
قوردان ەڭبەككە قابىلەتتىلىگىنەن ايىرىلعان جاعدايدا الەۋمەتتىك تولەم جالپى ەڭبەككە قابىلەتتىلىگىنەن ايىرىلۋ دارەجەسى بەلگىلەنگەن كەزەڭگە تاعايىندالادى جانە ەڭبەك قىزمەتىن جالعاستىرۋىنا قاراماستان تولەنەدى.
قوردان اسىراۋشىسىنان ايىرىلۋى جاعدايىنا الەۋمەتتىك تولەم اسىراۋىنداعىلار 18 جاسقا تولعانعا دەيىن، ال كۇندىزگى وقۋ نىسانى بويىنشا وقىعان جاعدايدا – 23 جاسقا دەيىن تولەنەدى.
ساتىپ الۋ قابىلەتىن قامتاماسىز ەتۋ ماقساتىندا بۇل تولەمدەردىڭ مولشەرى جىل سايىن ارتىرىلادى. 2023 جىلعى 1 قاڭتاردان باستاپ ۇزاق مەرزىمدى الەۋمەتتىك تولەمدەردىڭ مولشەرى اۆتوماتتى تۇردە 8،5%-عا وسەتىن بولادى.
الماتى قالاسى بويىنشا 6358 الۋشىعا ەڭبەككە قابىلەتتىلىگىنەن ايىرىلعان جاعدايعا جانە 4168 اسىراۋشىسىنان ايىرىلعان وتباسىعا تولەمدەر مولشەرى ۇلعايتىلدى.
وسىلايشا جۇمىس ىستەيتىن ازاماتتار الاتىن تولەمدەردىڭ جيىنتىق مولشەرى جۇمىس ىستەمەيتىن ازاماتتارعا قاراعاندا كوبىرەك بولادى.
سونىمەن قاتار، تولەمدەردى قايتا ەسەپتەۋ، ارتتىرۋ جانە ۇزارتۋ اۆتوماتتاندىرىلعان رەجيمدە جۇرگىزىلەتىنىن، ياعني الۋشىلارعا قوسىمشا قۇجاتتار جيناۋدىڭ قاجەتى جوق ەكەنىن ەرەكشە اتاپ وتكىم كەلەدى. مىندەتتى الەۋمەتتىك ساقتاندىرۋ جۇيەسى تۋرالى تولىعىراق اقپاراتتى قوردىڭ gfss.kz ينتەرنەت-رەسۋرسى ارقىلى، سونداي-اق قور مەن فيليالداردىڭ الەۋمەتتىك جەلىدەگى اككاۋنتتارىنان الۋعا بولادى.