جوعارى اۋديتورلىق پالاتانىڭ ءتوراعاسى ءاليحان سمايىلوۆ ماجىلىستە اۋىل شارۋاشىلىعى سالاسىنا جۇرگىزىلگەن تەكسەرۋدىڭ ناتيجەلەرىمەن ءبولىستى، دەپ حابارلايدى aqshamnews.kz
انىقتالعان بۇزۋشىلىقتار تاڭ قالدىرارلىق. ەكونوميكالىق ماڭىزدىلىعى جوعارى سالا بولعانىنا قاراماستان، اۋىل شارۋاشىلىعىنىڭ جىو-دەگى ۇلەسى وتە تومەن – ورتا ەسەپپەن نەبارى 5%.
سەبەپتەرى نەدە؟ نەگىزگى سەبەپتەر قاتارىندا تومەن ونىمدىلىك، سۋارمالى جەرلەردىڭ باياۋ ءوسۋى، سۋدى ءتيىمسىز پايدالانۋ، تاسىمال-لوگيستيكا ينفراقۇرىلىمىنىڭ ءالسىز دامۋى، ماتەريالدىق-تەحنيكالىق بازانىڭ جەتكىلىكسىزدىگى جانە تاعى باسقالارى اتاپ ءوتىلدى.
«سوڭعى بەس جىلدا بيۋدجەتتەن سۋبسيديالاۋعا شامامەن ەكى تريلليون تەڭگە ءبولىندى. الايدا، جۇيەلىك ماسەلەلەر ولاردىڭ تيىمدىلىگىن شەكتەپ تاستادى. ءبىرىنشى سەبەپ – ستراتەگيالىق جوسپارلاۋدىڭ ولقىلىقتارى مەن سالانى دامىتۋداعى ساباقتاستىقتىڭ بولماۋى. سوڭعى 10 جىلدا اۋىل شارۋاشىلىعى مينيسترلىگى بىرنەشە باعدارلامالىق قۇجاتتاردى قابىلدادى. ءبىراق ولاردىڭ كوبى اياقسىز قالدى. قۇجاتتاردىڭ بارلىعى جۇزەگە اسۋ بارىسىندا، ورتا جولدا كۇشى جويىلدى نەمەسە اياقسىز قالدى»، – دەپ اتاپ ءوتتى سمايىلوۆ.
قىزىعى نەدە؟ ميللياردتار جۇمسالعانىمەن، ناتيجە قايدا؟ ءاليحان سمايىلوۆ بۇل قارجىنىڭ ۇلكەن بولىگىنىڭ ءتيىمدى پايدالانىلماعانىن جانە مەملەكەت الداعى جوسپارلاۋ مەن سۋبسيديالاۋ جۇيەسىنە شۇعىل تۇردە وزگەرىستەر ەنگىزۋى قاجەت ەكەنىن قاداپ ايتتى. «شەشىمدەر قاعاز جۇزىندە قالدى، ەندى ناقتى ارەكەت قاجەت»، – دەدى ول.
ەلىمىزدىڭ اۋىل شارۋاشىلىعىنداعى اۋقىمدى ماسەلەلەر تەك قارجىلىق ەمەس، ستراتەگيالىق جوسپارلاۋداعى كەمشىلىكتەردەن دە تۋىنداعانى انىق. ال بۇل – سالاداعى جاعدايدى تۇبەگەيلى وزگەرتۋ قاجەتتىگىنىڭ دابىلى.