وسىدان ون ەكى جىل بۇرىن، ياعني 2011 جىلى 1 جەلتوقساندا الماتى مەتروپوليتەنى ىسكە قوسىلعان بولاتىن. وسى ايتۋلى داتاعا وراي الماتى مۋزەيى ءوز شاڭىراعىندا «الماتى مەتروسى – ەل ماقتانىشى» اتتى كورمە اشتى. ءيا، مەتروپوليتەنىمىز وسىلاي اسپەتتەۋگە ابدەن تۇرارلىق.
مەگاپوليستەگى مەتروپوليتەن جۇيەسى – قازاقستانداعى العاشقى، ورتا ازياداعى ەكىنشى (تاشكەنتتەن كەيىنگى) اشىلعان الىپ قۇرىلىس. ەلىمىز ءۇشىن ستراتەگيالىق ماڭىزدى نىسان. ونىڭ اشىلۋىن قالا تۇرعىندارىنىڭ وتە ۇزاق كۇتكەنى راس. قۇرىلىسى 1988 جىلى باستالعان بولاتىن. ءسويتىپ، جانكەشتى ەڭبەك اقتالىپ، زاماناۋي جەراستى كولىگىنە قول جەتكىزدىك.
باستاپقى مەتروجەلىسى جەتى ستانسيادان تۇردى: «رايىمبەك باتىر»، «جىبەك جولى»، «المالى»، «اباي»، «بايقوڭىر»، «مۇحتار اۋەزوۆ تەاترى» جانە «الاتاۋ». جالپى ۇزىندىعى 8،5 كم بولعان. 2015 جىلى «سايران»، «ماسكەۋ» ستانسيالارى اشىلعاننان كەيىن مەتروپوليتەن تاعى 2،74 شاقىرىمعا ۇزاردى. بۇگىندە الماتى مەتروپوليتەنى قوعامدىق كولىكتەردىڭ ەڭ زاماناۋي تۇرىنە اينالدى. باسقا كولىكتەرگە قاراعاندا جىلدام جۇرەدى، دىتتەگەن جەرىڭىزگە تەز جەتەسىز، ياعني التىن ۋاقىتىڭىزدى ۇنەمدەيسىز.
مەترو بەكەتتەرىنىڭ ەرەكشە ساۋلەت ونەرىمەن كومكەرىلگەن پلاتفورمالارى دا الماتىلىقتاردى جانە الماتى مەيماندارىن ەرىكسىز باۋراپ الارى ءسوزسىز. دالىرەك سۋرەتتەر بولساق، پلاتفورمالاردىڭ قابىرعالارى مەن ەدەنى ەجەلگى تاڭبالى جازۋلاردا، قولدانبالى ونەردە جانە ساۋلەت ەسكەرتكىشتەرىندە، قازاق حالقىنىڭ قازىرگى زامانعى ونەرىندە كەزدەسەتىن ويۋ-ورنەكتەرمەن، باسقا دا ۇلتتىق رەڭكتەگى ەلەمەنتتەرمەن ايشىقتالعان. مەتروستانسيالار كەڭ دە جارىق، مۇنتازداي تازا. جولاۋشىلاردىڭ قاۋىپسىزدىگىنە دە بارلىق جاعداي جاسالعان.
كەشەگى اشىلعان كورمەگە الماتى مۋزەيى قورىنداعى مەترو تاريحىنا قاتىستى قۇجاتتار، فوتوسۋرەتتەر، كىتاپتار، ماراپاتتار جانە الماتى مەتروپوليتەنىنىڭ ايعاقتى زاتتاي ماتەريالدارى، مەترو سىزبالارى، سحەمالارى قويىلعان.
كورمەنىڭ اشىلۋىنا مەترو ارداگەرى و.سماعۇلوۆ، مەترونى ەلەكترمەن قامتاماسىز ەتۋ قىزمەتىنىڭ اعا ەنەرگوديسپەچەرى ع.بايقۇلوۆ، جولدار جانە توننەلدىك عيماراتتار قىزمەتىنىڭ باس ينجەنەرى ە.مامىربەكوۆ قاتىسىپ، مەترو تاريحىنا قىزىعۋشىلىق بىلدىرگەن قالا تۇرعىندارى مەن قوناقتارىنا قىزىقتى ەستەلىكتەر ايتىپ بەردى.