الماتى قالاسىنىڭ المالى اۋداندىق سوتىمەن وڭتۇستىك استاناداعى مەترو قۇرىلىسى كەزىندە 5 ميلليارد تەڭگەدەن استام بيۋدجەت قاراجاتىن جىمقىردى دەپ ايىپتالعان 10 ادامعا قاتىستى ۇكىم شىعارىلدى. قىلمىسقا قاتىستى سوتقا دەيىنگى تەرگەپ-تەكسەرۋدى كولىك پروكۋراتۋراسى جۇرگىزدى، دەپ حابارلايدى اlmaty-akshamy.kz.
"سوت تالقىلاۋى بارىسىندا ايىپتاۋ جاعى سوتتالۋشىلاردىڭ "مەتروپوليتەن" كمك، "الماتىمەتروقۇرىلىس" اق، "اۆتوماتتاندىرۋ جانە تەحنولوگيالار قىزمەتى" ج ش س باسشىلارى بولا وتىرىپ، ادامدار توبىمەن، 2018 جىلدىڭ ماۋسىمىنان 2020 جىلدىڭ تامىزىنا دەيىنگى كەزەڭدە "سارىارقا" جانە "دوستىق" ستانسيالارىن سالۋ بارىسىندا قارجىلىق الاياقتىقپەن، ونىڭ ىشىندە جابدىقتىڭ قۇنىن ارتتىرىپ (ءىس جۇزىندە 10 ەسە)، تۇراقتى تۇردە ءىرى كولەمدەگى اقشالاردى جالعان فيرمالار ارقىلى شىعارعانىن دالەلدەدى"، - دەلىنگەن باس كولىك پروكۋراتۋراسى حابارلاماسىندا.
سوتتالعاندار مەملەكەتتىك جانە قارجى ۇيىمدارىندا جۇمىس ىستەۋ قۇقىعىنان ايىرىلا وتىرىپ، ءارتۇرلى مەرزىمگە باس بوستاندىعىنان ايىرىلدى (نەگىزگى فيگۋرانتتار 7 جىلدان 8 جىلعا دەيىن). سونىمەن قاتار، سوت 1 ملرد تەڭگەدەن استام سوماعا تىيىم سالىنعان مۇلىكتى تاركىلەۋدى قولدانىپ، مەملەكەتكە كەلتىرىلگەن شىعىندى ءوندىردى.