قالالىق موبيلدىلىك باسقارماسى- الماتىدا قوعامدىق كولىكتە جاڭا تاريفتىك ۇسىنىم ازىرلەنۋدە
VIII سايلانعان الماتى ءماسليحاتىنىڭ كەزەكتەن تىس XXI سەسسياسى بارىسىندا دەپۋتاتتار جول ءجۇرۋ قۇنىن 120 تەڭگەگە دەيىن ارتتىرۋدى كوزدەيتىن اكىمدىك قاۋلىسىنىڭ جوباسىن قارادى، دەپ حابارلايدى almaty-akshamy.kz
اتالعان ماسەلەنى تالقىلاۋ بارىسىندا دەپۋتات التىناي كوبەيەۆا جول ءجۇرۋ ءتاريفىنىڭ كوتەرىلۋى جولاۋشىلار ءۇشىن نەعۇرلىم قولايلى جاعدايلاردى قامتاماسىز ەتۋى ءتيىس ەكەنىن اتاپ ءوتىپ، قالالىق موبيلدىلىك باسقارماسى باسشىسىنان قالانىڭ قوعامدىق كولىگى قالاي داميتىنى تۋرالى تولىق ايتىپ بەرۋىن سۇرادى.
ءوز كەزەگىندە ساعىندىق تەلىبايەۆ بۇگىنگى ءتاريفتىڭ كوتەرىلۋى ءبىرىنشى كەزەكتە قوعامدىق كولىككە تەحنيكالىق قىزمەت كورسەتۋدىڭ جەدەلدىگى مەن ساپاسىنا، جۇرگىزۋشىلەردى قوسىمشا ىنتالاندىرۋعا جانە قازىرگى ۋاقىتتا جاڭا اۆتوبۋستار ساتىپ الۋعا وڭ اسەر ەتەتىنىن حابارلادى.
«نورماتيۆتىك وزگەرىستەرسىز ودان ءارى دامىتۋ مۇمكىن ەمەس. وسىعان بايلانىستى، ءبىز قولدانىستاعى زاڭناماعا تولىقتىرۋلار ەنگىزۋگە باستاماشىلىق جاسادىق جانە بۇگىنگى تاڭدا قالا اكىمدىگى الماتى جانە الماتى اگلومەراسياسى اۋماعىندا قولدانىستاعى سۋبسيديالاۋ قاعيدالارىن ازىرلەۋ قۇزىرەتىنە يە. ءبىز قوعامدىق كولىكتىڭ جاڭا رەتتەۋشى مودەلىن ازىرلەپ جاتىرمىز، ونىڭ اياسىندا سۋبسيديالاۋ تەتىكتەرى مەن تاسىمالداۋشىلارعا قويىلاتىن تالاپتار قايتا قارالاتىن بولادى. سونىمەن قاتار، كولىكتەن ەكىنشىسىنە تەگىن اۋىسىپ وتىرۋ مۇمكىندىگى بار جاڭا تاريفتىك ۇسىنىم ازىرلەنۋدە. اتالعان شارالاردى ىسكە اسىرۋ تاسىمالداۋشىلاردىڭ جاۋاپكەرشىلىگىن ارتتىرادى، سونداي - اق كورسەتىلەتىن قىزمەتتەردىڭ ساپاسىن ايتارلىقتاي جاقسارتادى»، - دەپ اتاپ ءوتتى قمب-نىڭ باسشىسى.
سونىمەن قاتار، ول وتكەن جىلدىڭ جەلتوقسان ايىندا قابىلدانعان كولىك قاڭقاسىنىڭ نەگىزى جىلدام قوعامدىق كولىك - مەترو، لرت جانە برت بولىپ تابىلاتىنىن اتاپ ءوتتى. ونىڭ ايتۋىنشا، بۇگىندە «قالقامان» مەترو ستانسياسىنىڭ قۇرىلىسى بويىنشا جۇمىستار جۇرگىزىلۋدە، سودان كەيىن مەترونى «بارلىق» بازارىنا دەيىن ۇزارتۋ، تاعى 3 جاڭا ستانسيا سالۋ جوسپارلانۋدا.
«بيىلعى جىلى ءبىز رايىمبەك داڭعىلى بويىنشا برت-نىڭ ءبىرىنشى ۋچاسكەسىن سالۋعا جانە جەلتوقسان كوشەسى بويىنشا تيميريازيەۆ كوشەسىنەن رايىمبەك داڭعىلىنا دەيىن برت-نى جالعاستىرۋعا كىرىسەمىز. سونداي-اق، تولە بي كوشەسى بويىنشا لرت قۇرىلىسىنا تەن (تەحنيكالىق ەكونوميكالىق نەگىزدەمە) ازىرلەۋ جالعاسۋدا. اتالعان جوبالاردى ىسكە اسىرۋ قوعامدىق كولىكتى دامىتۋعا وڭ اسەر ەتەدى، قالا تۇرعىندارى ءۇشىن قوزعالىس ىڭعايلى بولادى»، - دەپ قورىتىندىلادى ساعىندىق تەلىبايەۆ.