الماتىداعى قالالىق موبيلدىلىك باسقارماسى قوعامدىق كولىكتەگى قولما قول اقشاسىز تولەمنىڭ تۇرلەرىن تىزبەكتەدى
VIII سايلانعان الماتى ءماسليحاتىنىڭ كەزەكتەن تىس XXI سەسسياسى بارىسىندا دەپۋتاتتار قالانىڭ قوعامدىق كولىگىندە جول ءجۇرۋدىڭ 120 تەڭگەلىك جاڭا ءتاريفىن ماقۇلدادى.
دەپۋتاتتار الدىندا سويلەگەن سوزىندە قالالىق موبيلدىلىك باسقارماسىنىڭ باسشىسى ساعىندىق تەلىبايەۆ جاڭا تاريف ەنگىزە وتىرىپ، جول اقىسىن قولما-قول اقشامەن تولەۋدى الىپ تاستاۋدىڭ جوسپارلانىپ وتىرعانىن جەتكىزدى. ونىڭ ايتۋىنشا، بۇل شارا تاسىمالداۋ قاۋىپسىزدىگىن قامتاماسىز ەتۋگە باعىتتالعان، سەبەبى اۆتوبۋس جۇرگىزۋشىسى اقشا جيناۋعا الاڭداماي كولىك قۇرالىن باسقارادى.
«شىنىندا دا، كوپتەگەن ادام قالا قوناقتارى مەن زەينەتكەرلەر قولما-قول اقشا تولەۋگە مۇمكىندىگى بولماعان كەزدە قيىندىققا تاپ بولۋى مۇمكىن دەپ الاڭدايدى. ءبىراق بۇگىندە جولاۋشىلاردىڭ 97%-دان استامى جول اقىسىن قولما-قول اقشاسىز تولەيتىنىن، ونىڭ ىشىندە زەينەتكەرلەردىڭ 90%-دان استام ەكەنىن اتاپ وتكىم كەلەدى. زەينەتكەرلەردىڭ قالعان بولىگىنە قاجەت بولعان جاعدايدا كولىك كارتاسىن الۋعا كومەك كورسەتىلەدى»، - دەدى باسقارما باسشىسى.
ول بۇگىندە قولما-قول اقشاسىز ەسەپ ايىرىسۋدىڭ بىرنەشە ءادىسى بار ەكەنىن اتادى:
- «وڭاي» فيليالدارىندا جانە كليەنتتەرگە قىزمەت كورسەتۋدىڭ 115 پۋنكتىندە ساتىپ الۋعا بولاتىن كولىك كارتاسى ارقىلى؛
- SMS ارقىلى؛
- ءموبيلدى قوسىمشا ارقىلى (شەتەلدىك قوناقتارعا ىڭعايلى بولۋ ءۇشىن ينتەرفەيستى اعىلشىن تىلىندە ەنگىزۋ پىسىقتالۋدا)
«الماتى قالاسىنىڭ كولىك حولدينگىمەن بىرلەسىپ، ءبىز تولەمنىڭ ىقتيمال نۇسقالارى تۋرالى اقپاراتتاردى ورنالاستىرۋ بويىنشا جۇمىستى جالعاستىرامىز. ولاردىڭ بارلىعى تۇرعىندار ءۇشىن ىڭعايلى جانە قالا قوناقتارىنا تۇسىنىكتى»، - دەدى قالالىق موبيلدىلىك باسقارماسىنىڭ باسشىسى.