فرانسيانىڭ «پاري سەن-جەرمەن» كلۋبىنىڭ باس باپكەرى كريستوف گالتە كوماندانىڭ 3 ماۋسىمداعى «كلەرمونعا» قارسى كەزدەسۋى بەلگىلى فۋتبولشى ليونەل مەسسيدىڭ سوڭعى ويىنى بولاتىنىن راستادى، دەپ حابارلايدى قازاقپارات ءتىلشىسى ەuronews-كە سىلتەمە جاساپ.
ارگەنتينالىق شابۋىلشى ليونەل مەسسي فرانسيالىق «پاري سەن-جەرمەن» فۋتبول كلۋبىنان بيىلعى ماۋسىم اياقتالعاننان كەيىن كەتەدى.
«مەن ءۇشىن فۋتبول تاريحىنداعى الەمنىڭ ۇزدىك ويىنشىسىنا باپكەرلىك جاساۋ - ۇلكەن مارتەبە»، - دەدى پاريجدىك كلۋبتىڭ باس باپكەرى باسپا ءسوز ءماسليحاتىندا.
«ول ءارقاشان كوماندا ءۇشىن جۇمىس ىستەدى. ءاردايىم ويىندا بولدى. ارىپتەسىنە پاس بەردى نەمەسە گول سوقتى. قايتالاپ ايتا كەتەيىن، بۇل مەن ءۇشىن تەك باپكەرلىك جاساۋ عانا ەمەس ماۋسىمنىڭ بارلىق كەزەڭىندە قاسىندا جۇرگەنىمدى ۇلكەن مارتەبە دەپ باعالايمىن»، - دەدى گالتە.
«پاري سەن-جەرمەن» 3 ماۋسىمدا پاريجدە فرانسيا چەمپيوناتىنىڭ قورىتىندى تۋرىندا «كلەرمونعا» قارسى وينايدى. پاريجدىك كلۋب الدىن الا ەل چەمپيونى اتانىپ ۇلگەردى.
مەسسي كوماندا ساپىنا 2021 جىلى ەركىن اگەنت قۇقىعى بويىنشا قوسىلعان ەدى. «كلەرمونعا» قارسى ويىن ول ءۇشىن پسج ساپىنداعى سوڭعى كەزدەسۋ بولادى.