مەرزىمىندە قۇرىلىستى اياقتاي الماعان مەردىگەر مەكەمەنى الماتى اكىمدىگى سوتقا بەردى

الماتى اكىمدىگى №48 مەكتەپ-ليسەي عيماراتىن رەكونسترۋكسيالاۋ مەرزىمىن بۇزعانى ءۇشىن مەردىگەرلىك ۇيىمدى سوتقا بەردى

الماتى قالاسى اكىمىنىڭ ورىنباسارى اسقار ءامرين بيۋدجەت قارجىسىنا سالىناتىن پروبلەمالىق قۇرىلىس جانە رەكونسترۋكسيالاۋ نىساندارىن ارالاپ كورىپ، 2021 جىلدىڭ شىلدەسىندە باستالعان №48 مەكتەپ-ليسەي عيماراتىن قايتا جاڭارتۋ بويىنشا جۇرگىزىلىپ جاتقان جۇمىستىڭ بارىسىمەن تانىستى، دەپ حابارلايدى Almaty-akshamy.kz. 

قۇرىلىستىڭ نورماتيۆتىك مەرزىمى – 10 اي. قۇرىلىس ماتەريالدارىنىڭ قىمباتتاۋىنا بايلانىستى 2022 جىلى جوبالاۋ-سمەتالىق قۇجاتتاماعا تۇزەتۋ ەنگىزىلدى. جۇمىستىڭ اياقتالۋ مەرزىمى 2023 جىلدىڭ 31 قاڭتارىنا دەيىن ۇزارتىلدى. «ريگوليت» ج ش س مەردىگەرلىك ۇيىمىنا قاتىستى مىندەتتەمەلەردىڭ ساپاسىز ورىندالۋىنا بايلانىستى سوتقا تالاپ ارىز بەرىلدى. ءقازىر سوت پروسەسى ءجۇرىپ جاتىر.

بۇگىندە نىسان 99%-عا دايىن. 1 جانە 2 بلوك بويىنشا عيماراتتاردى سەيسميكالىق كۇشەيتۋ جۇمىستارى جۇرگىزىلدى، ىشكى ينجەنەرلىك جەلىلەر اۋىستىرىلدى، ىشكى جانە سىرتقى ارلەۋ جۇمىستارى اياقتالدى. 3، 4، 5 بلوك بويىنشا بارلىق ءمونوليتتى جۇمىس اياقتالدى، ينجەنەرلىك جەلىلەر جۇرگىزىلىپ، قوسىلدى، عيماراتتىڭ شاتىرى مەن تەرەزە بلوكتارى ورناتىلدى، ىشكى ارلەۋ جۇمىستارى جۇرگىزىلدى. 3، 4، 5 بلوكتى سىرتقى ارلەۋ، اۋماقتى اباتتاندىرۋ جانە جابدىقتى رەتتەۋ جۇمىستارى قولعا الىندى. 
وقۋ جىلىنىڭ باسىندا نىساندى پايدالانۋعا بەرۋ كوزدەلىپ وتىر.