ءو.جولداسبەكوۆ اتىنداعى ستۋدەنتتەر سارايىندا تاۋەلسىزدىكتىڭ 30 جىلدىعىنا ارنالعان سالتاناتتى جيىن ءوتتى.
مەرەكەلىك جيىنعا مەملەكەت جانە قوعام قايراتكەرلەرى، زيالى قاۋىم وكىلدەرى، ۋنيۆەرسيتەت ۇجىمى مەن وقۋ ورداسىنىڭ ءار جىلدارداعى تۇلەكتەرى قاتىستى.
وسىناۋ تابىسقا تولى 30 جىل ىشىندەگى ەڭسەلى ەلىمىزدىڭ ەرلىككە تولى ەڭبەك جولى مەن قول جەتكىزگەن جەتىستىكتەرى تۋرالى ءال-فارابي اتىنداعى قازاق ۇلتتىق ۋنيۆەرسيتەتىنىڭ باسقارما ءتوراعاسى – رەكتور جانسەيىت تۇيمەبايەۆ جان-جاقتى باياندادى.
– تاۋەلسىزدىك تويى – بۇل مەرەيلى مەرەكە عانا ەمەس، وتكەندى سارالايتىن، بولاشاقتى جوسپارلايتىن سىندارلى كەزەڭ. ەگەمەندى ەل بولعان ەلىمىز جاڭا وركەنيەتكە بەت بۇردى. ەلىمىزدە ۇلتتار تۇتاستىعى مەن بىرلىگى نىعايىپ، جاھاندىق بەيبىتشىلىكتى ساقتاۋعا ۇلەس قوستى. قازاقستان تۇركى الەمىنىڭ ورتالىعىنا اينالىپ، الەمدىك كەڭىستىكتەن ورىن الدى. وسىناۋ تاريحي جەتىستىكتەردىڭ بارلىق باستاۋىندا قازاقستاننىڭ تۇڭعىش پرەزيدەنتى – ەلباسىمىز نۇرسۇلتان نازاربايەۆتىڭ ولشەۋسىز ەڭبەگى تۇر، – دەگەن وقۋ ورداسىنىڭ باسشىسى ەلباسىنىڭ قازاقستان مەملەكەتىنىڭ قالىپتاسۋىنداعى ەرەكشە ەڭبەگىن ايرىقشا اتاپ كورسەتتى.
سونىمەن قاتار، وقۋ ورداسىنىڭ جاستار تاربيەسىنە ەرەكشە نازار اۋدارىپ، ءمان بەرىپ وتىرعانىن جەتكىزدى. تاۋەلسىزدىگىمىزدى قاستەرلەۋ تۇرعىسىندا اتقارىلىپ جاتقان جۇمىستارعا توقتالىپ، ەلباسى ساياباعى مەن عالىمدار باعى اشىلعانىن، ايتۋلى تۇلعالاردىڭ ءدارىس وقۋى تۇراقتى ۇردىسكە اينالعانىن مىسال ەتتى.
مەرەكە اياسىندا وقىتۋشى پروفەسسورلار مەن ۇزدىك قىزمەتكەرلەر «ءال-فارابي اتىنداعى قازۇۋ-عا سىڭىرگەن ەرەن ەڭبەگى ءۇشىن» مەدالىمەن جانە رەكتوردىڭ قۇرمەت گراموتالارىمەن ماراپاتتالدى.
جيىن سوڭىندا «تاۋەلسىزدىك – بارىنەن قىمبات» اتتى ونكۇندىك قورىتىندىلانىپ، قوناقتار كىتاپ جانە فوتوكورمەنى تاماشالادى.