الاتاۋ اۋدانىنىڭ تۇرعىندارى كونستيتۋسيا كۇنىن اتاپ ءوتتى
الماتى قالاسى الاتاۋ اۋدانى اكىمىنىڭ اپپاراتى قازاقستان رەسپۋبليكاسىنىڭ كونستيتۋسيا كۇنى مەرەكەسى قارساڭىندا اۋدان تۇرعىندارىنا ارناپ «ايبارلى اسقار ەلدى اسقاقتاتار اتا زاڭ» اتتى ەرەكشە مەرەكەلىك ءىس-شارا وتكىزدى.
– ەلدىگى مەن تەڭدىگىن دۇنيەنىڭ ءتورت قۇبىلاسىنا پاش ەتكەن تاۋەلسىز قازاقستانىمىزدىڭ التىن ارىپپەن جازىلعان اتا زاڭىن قابىلداعانىنا بيىل – 27 جىل. قوعام دامۋىنىڭ نەگىزگى مىندەتتەرى مەن تالاپتارىنا ساي كەلەتىن ەلىمىزدىڭ كونستيتۋسياسىن دامىعان ەلدەر مەن حالىقارالىق بىرلەستىكتەر تانىپ، ءبىلىپ، قۇرمەت تۇتىپ مويىنداپ وتىر. عاسىرلار قويناۋىنان سۇرىپتالىپ جەتكەن، اتا-بابامىزعا ارمان بولعان تاۋەلسىز ەلدىڭ كونستيتۋسياسى كۇنى وتانىمىزدىڭ ءاربىر ازاماتى ءۇشىن قاستەرلى كۇن دەپ بىلەمىز. سىزدەردى ايتۋلى مەرەكەمەن شىن جۇرەكتەن قۇتتىقتايمىز! – دەپ ساحنا شىمىلدىعىن اشقان مەرەكەلىك كەشتىڭ جۇرگىزۋشىلەرى اۋدان تۇرعىندارىنا قۇتتىقتاۋ جولداپ، جىلى لەبىزدەرىن ءبىلدىردى.
«نۇركەنت» ىقشاماۋدانىنداعى اتلەتتەر اۋىلى ايماعىندا ۇيىمداستىرىلعان سالتاناتتى ءىس-شاراعا اۋدان حالقى وتە كوپ جينالدى. البەتتە، مۇنداي سالتاناتتى شارالاردىڭ وتاندىق ونەر جۇلدىزدارىنىڭ قاتىسۋىنسىز وتپەيتىنى بەلگىلى. اتالمىش كەشتە روزا رىمبايەۆا، تالعات كۇزەمبايەۆ سەكىلدى تانىمال ونەر مايتالماندارى اننەن شاشۋ شاشىپ، كورەرمەندەرگە كوتەرىڭكى كوڭىل-كۇي سىيلادى. مادەني شارادا الاتاۋ اۋدانىنداعى شىعارماشىلىق ۇجىمدار دا قالىس قالعان جوق. بالالار ونەر مەكتەبىنىڭ ۇيىمداستىرعان كونسەرتتىك باعدارلاما بارىسىندا مىڭ بۇرالا بي بيلەگەن «جاس وركەن»، «اقنۇر» سەكىلدى جاس ونەرپاز بيشىلەر توبىنا سۇيسىنبەگەن جان قالمادى. قىزىققا تولى دۋماندى كەشتە جاس انشىلەر اۋەلەتە ءان سالىپ، كوپشىلىكتىڭ ىستىق ىقىلاسىنا بولەندى.
الاڭنىڭ ەكىنشى شەتىندە قازاقشا كۇرەس، اسىق اتۋ، ارقان تارتۋ، توعىز قۇمالاق سياقتى ۇلتتىق سپورت تۇرلەرىنەن جارىستار وتكىزىلدى. قوعامدىق سەرۋەندەۋمەن جالعاسقان مەرەكەلىك كوڭىل-كۇي، اسىرەسە، اۋداننىڭ كىشكەنتاي تۇرعىندارىنا ەرەكشە ۇناعانى انىق. ويتكەنى، اۋدان اكىمدىگى بۇلدىرشىندەر ءۇشىن ءارتۇرلى ويىن الاڭدارىن ورناتىپتى. باتۋتقا سەكىرىپ، اتكەنشەكتە شىر اينالعان بۇلدىرشىندەردىڭ الاڭسىز كۇلكىسى الماتى اسپانىن شايداي جارىق ەتىپ، كۇن ساۋلەسىن توكپەسىنە قويمادى. وسىلايشا اتا-اجەلەرىمەن، اكە-شەشەلەرىمەن بىرگە كەلگەن كىشكەنتاي بۇلدىرشىندەردىڭ باقىتتى شاقتارى مەن بىلدىرلاعان ءتاتتى ءۇنى بۇگىنگى اتالىپ ءوتىپ جاتقان مەرەكەنىڭ ماعىناسىن تەرەڭدەتە تۇسكەندەي بولدى.
ەلىمىزدىڭ وركەندەۋىنە جانە مەملەكەتتىك بيلىكتىڭ قالىپتاسۋىنا، ەكونوميكا، الەۋمەت، مادەنيەت سالالارىنىڭ قارقىندى دامۋىنا جول اشقان ايتۋلى مەرەكەنى الاتاۋ اۋدانىنىڭ تۇرعىندارى وسىلاي اتاپ ءوتتى. كەرەمەت مەرەكەلىك كوتەرىڭكى كوڭىل-كۇي سىيلاعان ۇيىمداستىرۋشىلارعا جينالعان جۇرتشىلىق العىستارىن جاۋدىردى.