ءىىم قازاقستاندىقتاردى جاڭا جىلدىق مەرەكە قارساڭىندا ساق بولۋعا شاقىردى، دەپ حابارلايدى aqshamnews.kz
الاياقتار ءقاۋىپتى فايلدار تىركەلگەن "جاڭا جىلدىق قۇتتىقتاۋلاردى" تاراتىپ، سونداي-اق، باعاسى ادەيى تومەندەتىلگەن سىيلىقتار مەن تاۋارلار تۋرالى جالعان حابارلاندىرۋلار جاريالايدى.
"اقشا اۋدارىلعاننان كەيىن بايلانىستى توقتاتادى. الاياقتار انيماسياسى نەمەسە مۋزىكاسى بار جارقىن قۇتتىقتاۋ جىبەرىپ، فايل ارقىلى پارولدەرگە، بانك كارتالارىنا جانە قوسىمشالارعا قول جەتكىزەدى. سونداي-اق، نارىقتاعى باعادان ەداۋىر تومەن باعادا تاۋار نەمەسە سىيلىق ۇسىنادى. اقشانى شۇعىل تۇردە اۋدارۋعا كوندىرەدى. تولەم جاسالعان سوڭ حابارلاندىرۋدى ءوشىرىپ، جاۋاپ بەرمەيدى"، – دەپ جازىلعان حابارلامادا.
پوليسيانىڭ حابارلاۋىنشا، الاياقتار ءجيى جالعان اككاۋنتتار مەن قولدان جاسالعان پىكىرلەردى پايدالانىپ، ءوزىن سەنىمدى ساتۋشى رەتىندە كورسەتەدى. سوندىقتان بەيتانىس ساتۋشىلارعا الدىن الا اقشا اۋدارماي پىكىرلەر مەن اككاۋنتتىڭ تاريحىن مۇقيات تەكسەرۋ قاجەت.
"بەيتانىس ادامداردان كەلگەن فايلدار مەن سىلتەمەلەردى اشپاي، apk كەڭەيتىمى بار فايلداردى بىردەن وشىرگەنىڭىز ابزال. قاۋىپسىزدىك بارىنەن ماڭىزدى. ءوزىڭىزدى جانە قاراجاتىڭىزدى قورعاڭىز"، – دەپ جازىلعان حابارلامادا.