وندا تانىمال ايەلدەردىڭ تىلەگى جازىلعان.
جاڭا ادامدار بەلسەندىلەرى قازاقستاننىڭ تانىمال ايەلدەرىنىڭ جولداۋى بار 10 000 كامپيتتى مەرەكە قارساڭىندا سىيعا تارتتى، دەپ حابارلايدى Almaty-akshamy.kz Elorda.info سايتىنا سىلتەمە جاساپ.
100 جىلدان بەرى الەمدە جىل سايىن حالىقارالىق ايەلدەر كۇنى اتالىپ وتەدى. ءبىراق وسىدان ەكى ءجۇز جىلداي بۇرىن ايەلدەر سايلاۋدا داۋىس بەرۋگە دە قاتىسا المايتىن، ءتىپتى جوعارى وقۋ ورنىندا ءبىلىم الۋعا مۇمكىندىگى بولمايتىن. ال ءقازىر شە؟ وكىنىشكە قاراي، قازاقستان قوعامىندا ايەلدەرگە كەمسىتە قاراپ، قۇقىقتارىن بۇزۋ جايتتارى ءالى دە كەزدەسىپ تۇرادى. ونىڭ ءبىراز مىسالىن ءبارىمىز بىلەمىز. دەمەك ءالى دە كۇرەستى توقتاتپاۋ كەرەك.
جاڭا ادامدار بەلسەندىلەرى حالىقارالىق ايەلدەر كۇنىنە قاراي جەتىستىككە جەتىپ قانا قويماي، ءوز سالاسىندا ۇزدىك اتانعان تانىمال ءارى تابىستى قازاقستاندىق ايەلدەردىڭ جولداۋى جازىلعان 10 000 كامپيت دايىندادى. ءوز ءىسىنىڭ شەبەرى اتانعان ايەلدەر «ارمانىڭىزعا قورىقپاي تالپىنساڭىز، بۇل ومىردە ءبارى مۇمكىن» دەگەن ۇندەۋمەن جەكە جاعدايلارىن ۇلگى ەتەدى. ولار كەز كەلگەن قىز بالا اتاقتى عالىم دا، تابىستى ساياساتكەر دە نەمەسە بۇكىل الەمگە ايگىلى بوكسشى بولا الادى دەگەن سەنىم ارتتى.
موتيۆاسيالىق جولداۋلاردى جازعاندار:
نەللي بۋبە – ق ر ەڭبەك سىڭىرگەن مادەنيەت قايراتكەرى، سۋرەتشى، گرافيك، يلليۋستراتور.
ايدا بالايەۆا – قازاقستان مەملەكەتىنىڭ قايراتكەرى. 2022 جىلعى 11 قاڭتاردان باستاپ پرەزيدەنت اكىمشىلىگى باسشىسىنىڭ ءبىرىنشى ورىنباسارى. اقپارات جانە قوعامدىق دامۋ ءمينيسترى. الەۋمەتتانۋ عىلىمدارىنىڭ كانديداتى.
بايان ماقسات قىزى – قازاقستاندىق پروديۋسەر، Shine Production كومپانياسىنىڭ باسشىسى، تەلەجۇرگىزۋشى، اكتريسا، ءانشى.
ايسۇلۋ ەرنيازوۆا – عىلىم جانە جوعارى ءبىلىم ءمينيسترىنىڭ كەڭەسشىسى.
دامەل مەكتەبەپبايەۆا – بيوتەحنولوگ، قوزىبايەۆ ۋنيۆەرسيتەتىنىڭ پرورەكتورى، NASA-عا تۇسكەن العاشقى قازاقستاندىق.
نازىم قىزايباي – قازاقستاندىق بوكسشى، جەتى دۇركىن قازاقستان چەمپيونى، ەكى دۇركىن الەم چەمپيونى.
دينارا ءسادۋاقاسوۆا – شاحماتتان 4 دۇركىن الەم چەمپيونى، ازيا چەمپيونى، حالىقارالىق گروسسمەيستەر.
قۇراربەك ەڭلىك – قازاقستاندىق شوۋ-بيزنەستىڭ جۇلدىزى.
اسەل بادەنوۆا – جاڭا ادامدار جاستار قوزعالىسىنىڭ كوشباسشىسى.
سىزدەردىڭ قولدارىڭىزدا تۇرعان – قازاقستاننىڭ ايگىلى ايەلدەرىنىڭ «جولداۋلى كامپيتتەرى». ءاربىر كامپيتتە – سىزدەرگە دەگەن جولداۋ بار، وندا – ولاردىڭ جەڭىسى تۋرالى، باستىسى، بىرەگەي تاريحى جازىلعان. بۇل كامپيتتەر تەك سىيلىق قانا ەمەس، ءوز ارماندارىڭىزدى قالدىرماي، قالاي دا بولسا جۇزەگە اسىرۋعا تالپىنىس جاساۋعا ۇندەۋ. ويتكەنى سىزدەردىڭ جۇمىستاعى، سپورتتاعى، بيزنەستەگى، وتباسىنداعى، ومىردەگى جەڭىستەرىڭىز قازاقستاندى تەك قانا كوركەيتەدى! – دەيدى جاڭا ادامدار جاستار قوزعالىسىنىڭ بەلسەندىسى ريزابەك راشيت.