18 جەلتوقسان كۇنى "حابار" تەلەارناسىنان ايگىلى ءانشى تۋرالى تاريحي فيلم كورەرمەن نازارىنا ۇسىنىلادى.
وسى جىلى روزا باعلانوۆانىڭ ءومىرى جايلى تاريحي دراما تەلەەفيردە شىعادى، دەپ حابارلايدى Almaty-akshamy.kz
ق ر اقپارات جانە قوعامدىق دامۋ مينيسترلىگىنىڭ قولداۋىمەن 18-19 جەلتوقسان 12:30-دا «حابار» تەلەارناسى كسرو حالىق ءارتىسى روزا باعلانوۆانىڭ ومىرىنە ارنالعان تاريحي «بۇلبۇل» تەلەحيكاياسىنىڭ تۇساۋكەسەرىن ۇسىنباق.
جاقىندا الماتىدا اتى اڭىزعا اينالعان ءانشىنىڭ تۋىستارى مەن دوستارىنىڭ قاتىسۋىمەن جابىق كورسەتىلىم ءوتتى. 2022 جىلدىڭ 1 قاڭتارىندا تۋعانىنا 100 جىل تولادى.
«بۇلبۇل» تەلەحيكاياسى – ۇلى تۇلعانىڭ ومىرىنەن سىر شەرتەتىن زاماناۋي بايوپيك كانوندارىنا قۇرالعان بيوگرافيالىق كارتينا. روزا باعلانوۆا ءومىرىنىڭ نەگىزگى تۇستارىن اشاتىن تاريحي ءبولىمى دە بار. شىعارماشىلىقتان تىس ءومىرى دە كورسەتىلگەن. روزا ءتاجىباي قىزىنىڭ ءىسساپارلارى مەن انشىلىگىنەن بولەك بەلسەندى ازاماتتىق ۇستانىمى دا بار بولاتىن. ارال تەڭىزى مەن سەمەي پوليگونى ماسەلەلەرى جايلى ءجيى ايتاتىن.
«بۇل كۇندەر وتە اۋىر، ءبىراق وتە قىزىقتى وتكەن ەدى. كارانتينعا بايلانىستى ءتۇسىرىلىمدى كەيىنگە شەگەرىپ جۇردىك. ءبىراق ەشتەڭەگە قاراماستان، سەريالدى تاشكەنتتە دە، مينسكىدە دە، الماتىدا دا تۇسىردىك. دەكوراسيا، ساحنالىق كوستيۋمدەر تاڭداۋ جانە بەزەندىرۋ بويىنشا كوپ جۇمىس جاسالدى. ءتىپتى بازار ارالاپ، اجەلەردەن ساتىپ الىپ تا جۇردىك»، - دەدى باس پروديۋسەر گۇلنۇر ماماساريپوۆا.
