ەڭبەك جانە الەۋمەتتىك قورعاۋ كوميتەتىنىڭ ءتوراعاسى – ق ر باس مەملەكەتتىك ەڭبەك ينسپەكتورى تولەگەن وسپانقۇلوۆ «سامۇرىق-قازىنانىڭ» تاپسىرىسىن ورىنداۋشى مەردىگەر ۇيىمدار ەڭبەك قاۋىپسىزدىگىن ساقتامايتىنىن پروبلەما ەتىپ كوتەردى، دەپ حابارلايدى اlmaty-akshamy.kz قازاقپارات-قا سىلتەمە جاساپ.
«سامۇرىق-قازىنا» كومپانيالار توبىندا ەڭبەك قاۋىپسىزدىگى جونىندە جۇمىس شىنىمەن جۇرگىزىلىپ جاتىر. ءبىراق بۇل جۇمىس ونىڭ مەردىگەر ۇيىمدارىندا جۇرگىزىلمەيدى. مىسالى، مەن ەلدىڭ باس ەڭبەك ينسپەكتورى رەتىندە جۇمىس بابىمەن «قازاتومونەركاسىپتەن» باسقا سالالاردىڭ ءبارىن ارالاپ شىقتىم. ونداعى احۋالدى ءوز كوزىممەن كوردىم دەۋگە بولادى. 2020 جىلى ءبىز ەڭبەك كودەكسىنە ۆەرتيكالدى باقىلاۋ تۋرالى نورمانى جايدان-جاي ەنگىزگەن جوقپىز. ءبىراق ول نورمانىڭ تەك قۇرىلىس الاڭدارىنا عانا قاتىسى بار. ال «سامۇرىق-قازىنا» ءوزىنىڭ ىشكى قۇجاتتارىمەن وزىنە تيەسىلى كاسىپورىندارداعى جاعدايدى ىشكى باقىلاۋ ارقىلى رەتتەيدى. دەگەنمەن بۇل نورما قازىرگى تاڭدا سونشالىقتى جاقسى جۇمىس ىستەپ جاتقان جوق. سونىڭ سالدارىنان بىلتىر بىرنەشە قايعىلى وقيعا بولدى»، - دەدى ول.
ۆەدومستۆو وكىلى مەردىگەر ۇيىمدارمەن كەلىسىمشارت ءبىر جىلعا عانا جاسالاتىنىن ەسكە سالدى.
«ءبىز مەردىگەر ۇيىمدارمەن كەلىسىمشارت ءبىر جىلعا عانا جاسالاتىنىن بىلەمىز. بۇل جۇمىس بەرۋشىگە ەڭبەك قاۋىپسىزدىگىنە اقشا سالۋعا مۇمكىندىك بەرمەيدى. مىنا جەردە ەڭبەك قاۋىپسىزدىگىنە 1 پايىز عانا قاراجات ءبولۋ از با، كوپ پە دەگەن ساۋال قويىپ جاتىرسىزدار. ونىڭ ءوزى «سامۇرىق-قازىنا» كومپانيالار توبىنداعى كاسىپورىندا عانا ساقتالادى. ال مەردىگەر ۇيىمداردا وسى 1 پايىز دا بولىنبەيدى. ويتكەنى ولارعا تەندەرگە قاتىسۋ ءۇشىن دەمپينگ جاساۋ كەرەك، ايلىقتى كوبەيتۋ كەرەك. سوندىقتان مەردىگەر ۇيىمداردا تەحنيكا جاڭارتىلمايدى. بۇگىنگى تاڭدا «سامۇرىق-قازىنا» كومپانيالار توبىندا كەلىسىمشارتتى كەم دەگەندە 3 جىلعا بەكىتۋ ماسەلەسى قارالىپ جاتقانىن بىلەم. ەگەر وسى جۇمىستى اياعىنا جەتكىزسە، تەك قانا كومپانيالار توبىندا ەمەس، مەردىگەر ۇيىمداردا دا وندىرىستىك جاراقات ازايار ەدى دەپ ويلايمىن»، - دەدى تولەگەن وسپانقۇلوۆ.