الماتىدا مەملەكەتتىك قۋىرشاق تەاترىندا بەردىبەك سوقپاقبايەۆتىڭ «مەنىڭ اتىم قوجا» پوۆەسى ساحنالانادى
الماتىدا مەملەكەتتىك قۋىرشاق تەاترىندا 10 جىلدا العاش رەت جاڭارتۋ جانە جوندەۋ جۇمىستارى جۇرگىزىلدى، دەپ حابارلايدى almaty-akshamy.kz
الماتىدا مەملەكەتتىك قۋىرشاق تەاترىن جاڭعىرتۋ جانە جوندەۋ جۇمىستارى اياقتالدى. اتاپ ايتقاندا، كورەرمەندەر جايعاساتىن زالداعى ورىندار قالپىنا كەلتىرىلىپ، ساحنا كەڭىستىگى، دايىندىق زالدارى، كيىم اۋىستىراتىن بولمەلەر، عيماراتتىڭ فويەلەرى، كيىم-كەشەك بولمەلەرى، سانيتارلىق-گيگيەنالىق جانە باسقا دا ءۇي-جايلار جوندەلدى. سونىمەن قوسا، ساپالى داۋىس پەن جارىقتى قامتاماسىز ەتەتىن سوڭعى ۇلگىدەگى زاماناۋي ساحنا جابدىقتارى جاڭارتىلدى. ءقازىر جوندەۋ جۇمىستارىنان كەيىن مەكەمەنى تازارتىپ، فويە ديزاينىن جاقسارتۋ ءۇشىن جۇمىس ىستەپ جاتىر.
ايتا كەتەيىك، الماتى قالاسىنىڭ اكىمى ەربولات دوسايەۆ 2022 جىلدىڭ شىلدە ايىندا مەگاپوليستىڭ كەيبىر مادەني نىساندارىن ارالاۋ بارىسىندا مەملەكەتتىك قۋىرشاق تەاترىن جاڭارتۋ مەن جوندەۋدى، سونىمەن قاتار، تەاتر اۋماعىن اباتتاندىرۋدى تاپسىرعان بولاتىن.
«كەلەسى جىلى تەاتردىڭ قۇرىلعانىنا 90 جىل تولادى. جىل سايىن شامامەن 80 مىڭنان استام كورەرمەندى قابىلدايتىن ونەر ورداسى بۇلدىرشىندەردىڭ دە، ەرەسەك ازاماتتاردىڭ دا سۇيىسپەنشىلىگىنە بولەنىپ كەلەدى. ارينە، بۇل ءبىزدى قۋانتادى. عيماراتتى قالپىنا كەلتىرۋ 10 جىل بۇرىن جۇرگىزىلگەن. الايدا قۋىرشاق تەاترىنىڭ جابدىقتارى ەسكىرگەن، ال ينتەرەرى جاڭارتۋدى قاجەت ەتتى. سوندىقتان قالا اكىمى عيماراتتى جوندەۋگە، جابدىقتى جاڭارتۋعا جانە قۋىرشاق تەاترىنىڭ قىزمەتكەرلەرىنە قولايلى جاعداي جاساۋعا شەشىم قابىلدادى. جاقىندا كورەرمەندەر وزدەرىنىڭ سۇيىكتى قويىلىمىنا قاتىسىپ، سپەكتاكلدەردى جايلى جاعدايدا تاماشالاي الادى»، - دەدى الماتى قالاسى مادەنيەت باسقارماسىنىڭ باسشىسى عاني مايلىبايەۆ.
ال تەاتردىڭ شىعارماشىلىق ۇجىمى كورەرمەندەرگە بىرنەشە پرەمەرا دايىنداپ جاتىر. ولاردىڭ اراسىندا شارل پەررو ەرتەگىسى نەگىزىندە «ەتىك كيگەن مىسىق»، گوگولدىڭ «شينەل» جانە بەردىبەك سوقپاقبايەۆتىڭ «مەنىڭ اتىم قوجا» پوۆەسى جانە باسقا دا سپەكتاكلدەر بار.
كۇردەلى جوندەۋدەن كەيىن تەاتر ءوزىنىڭ العاشقى قويىلىمىن 2024 جىلدىڭ اقپان ايىنىڭ سوڭىنا تامان كورەرمەن نازارىنا ۇسىنادى. قويىلىمدار كەستەسى جاقىندا تەاتردىڭ Instagram-داعى رەسمي پاراقشاسىندا @kuyrshak_teatry جانە puppet.kz سايتىندا جاريالانادى. ەستەرىڭىزگە سالا كەتەيىك، تەاتر پۋشكين كوشەسى، 63 مەكەنجايىندا ورنالاسقان.
