قازاقستاننىڭ ەڭبەك سىڭىرگەن قايراتكەرى نۇرلان سەگىزبايەۆ دۇنيەدەن ءوتتى. ول ابدوللا قارساقبايەۆتىڭ ايگىلى «مەنىڭ اتىم قوجا» كوركەم فيلمىندەگى باستى ءرولى ارقىلى كورەرمەنگە كەڭىنەن تانىلدى. قازاقستان رەسپۋبليكاسى مادەنيەت جانە اقپارات مينيسترلىگى مارقۇمنىڭ وتباسى مەن جاقىندارىنا، سونداي-اق قازاقستان حالقىنا كوڭىل ايتتى.
«نۇرلان سانجار ۇلى – قازاق مادەنيەتى مەن ونەرىنىڭ دامۋىنا ەلەۋلى ۇلەس قوسقان تۇلعا. ول ءوز عۇمىرىن شىعارماشىلىققا، ۇلتتىق رۋحانياتقا ارناپ، كەيىنگى ۇرپاققا ونەگە بولاتىن مول مۇرا قالدىردى. ونەرسۇيەر جۇرتشىلىققا ءالى كۇنگە قۇندىلىعىن جويماي كەلە جاتقان ابدوللا قارساقبايەۆتىڭ «مەنىڭ اتىم قوجا» فيلمىندەگى باستى رولىمەن تانىمال ونەر يەسى قازاق كينو ونەرىندەگى دارا تۇلعا بولدى. ونىڭ ەكراندا جاساعان كوركەم بەينەلەرى وتاندىق ونەر تاريحىندا ايرىقشا ورىن الادى. نۇرلان سانجار ۇلىنىڭ جارقىن بەينەسى، شىعارماشىلىق مۇراسى مەن عيبراتتى عۇمىر جولى حالقىمىزدىڭ جادىندا ماڭگى ساقتالادى دەپ سەنەمىز. مارقۇمنىڭ جانى ءجانناتتا، يمانى سالامات، توپىراعى تورقا بولعاي»، - دەلىنگەن حابارلامادا.
سوڭعى جىلدارى نۇرلان سانجار ۇلى اۋىر دەرتپەن كۇرەسكەن. دارىگەرلەر وعان وكپەنىڭ سوزىلمالى وبسترۋكتيۆتى اۋرۋىنىڭ (حوبل) 4-دارەجەسى دياگنوزىن قويعان.
قازاقستاننىڭ ەڭبەك سىڭىرگەن قايراتكەرى، اكتەر، كينوگەر نۇرلان سانجاردىڭ جانازاناسى مەن قوشتاسۋ 28-جەلتوقسان (جەكسەنبى) جازۋشىلار وداعىنىڭ عيماراتىندا ساع. 10-دا وتەدى.