«مەنىڭ اتىم قوجا» ءفيلمى ۆەنگريادا كورسەتىلدى

«مەنىڭ اتىم قوجا» كوركەم ءفيلمىنىڭ كورسەتىلىمى بۋداپەشتتە ءوتتى.

قازاق دياسپوراسىنىڭ وكىلدەرى جانە ۆەنگريادا ءبىلىم الىپ جاتقان قازاقستاندىق ستۋدەنتتەر ءتۇرلى قىزىق وقيعاعا تاپ بولاتىن ىزدەنىمپاز، مەيىرىمدى، مىنەزى اشىق 12 جاسار بالا تۋرالى كينوكارتينانى جوعارى باعالادى، دەپ حابارلايدى Almaty-aksamy.kz.

قازاق جاستارى باس قوسىپ، وسىنداي يگى شارالاردى ءجيى وتكىزۋدى جوسپارلاپ وتىر. ەلشىلىكتىڭ مالىمەتى بويىنشا، قازاقستاننىڭ 800-گە جۋىق ازاماتى ۆەنگريانىڭ ۇزدىك جوعارى وقۋ ورىندارىندا ءبىلىمىن جەتىلدىرۋدە.

«قازىرگى زاماندا شەتەلدە جۇرگەن قازاق جاستارى ءۇشىن وسىنداي شارانىڭ بولعانى ماڭىزدى. قازاقتىڭ ادەت-عۇرپى مەن مادەنيەتى، ءتىلى مەن ءانى، سالت-ساناسىن شەتتە جۇرگەن قازاق جاستارى ساعىنادى. سوندىقتان ۇلگى، ساباق بولاتىن وتاندىق دۇنيەلەردى كورسەتكەن ءجون»، - دەيدى ۆەنگرياداعى «اباي» مادەني ورتالىعىنىڭ ءتورايىمى وڭايشا ماندوكي.

«شەتەلدەگى قازاق ستۋدەنتتەر وتاندىق فيلمدەردى كورۋ ءۇشىن جينالىپ، تانىسىپ، بىر-بىرىمىزبەن قارىم-قاتىناسىمىزدى جاقسارتامىز. انا تىلىمىزدە سويلەسىپ، ءوز مادەنيەتىمىزدى ەسكە الىپ جانە ونى جاڭعىرتامىز دەپ ويلايمىن»، - دەيدى ستۋدەنت ماليكا ساعىنايەۆا.