الماتىلىق زەينەتكەرلەر ۇزاق ءومىر ءسۇرۋ فەستيۆالىندە ءوز تالانتتارىن اشادى، دەپ حابارلايدى aqshamnews.kz
الماتىدا قارتتار ايلىعى اياسىندا «اسىل قازىنام» ۇزاق ءومىر ءسۇرۋ فەستيۆالى ءوتتى. الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ بەلسەندى ۇزاق ءومىر ءسۇرۋ ورتالىعىنىڭ قىزمەت الۋشىلارى جارقىن كونسەرتتىك باعدارلاما ۇسىندى: ۇلتتىق كيىم ۇلگىلەرىنىڭ كورسەتىلىمى، بي ۇجىمدارىنىڭ، دومبىرا وركەسترىنىڭ، تەاترلاندىرىلعان جانە سپورتتىق قويىلىمداردىڭ كورىنىستەرى بولدى.
ۇلكەن ساحنادا زەينەتكەرلەر — يتاليا، تۇركيا، قىرعىزستان جانە باسقا ەلدەردەگى حالىقارالىق بايقاۋلاردىڭ بىرنەشە دۇركىن جۇلدەگەرلەرى ونەر كورسەتتى، سونداي-اق قاتىسۋشىلاردىڭ شىعارماشىلىق جۇمىستارىنىڭ كورمەسى ۇيىمداستىرىلدى.
الماتىدا اكىمنىڭ تاپسىرماسى بويىنشا 2022 جىلدان باستاپ «بەلسەندى ۇزاق ءومىر ءسۇرۋ» جوباسى ءساتتى جۇزەگە اسىرىلىپ كەلەدى. قالادا كۇن سايىن 500-دەن استام زەينەتكەر باراتىن 15 بەلسەندى ۇزاق ءومىر ءسۇرۋ ورتالىعى اشىلدى. ايتا كەتۋ كەرەك، 2024 جىلى قالانىڭ بوستاندىق جانە مەدەۋ اۋداندارىندا قوسىمشا 3 بەلسەندى ۇزاق ءومىر ءسۇرۋ ورتالىعى اشىلدى.
وسىنداي ورتالىقتاردىڭ بىرىنە 66 جاستاعى ءماديا بايسابايەۆا دا بارادى. ول ءومىر بويى وندىرىستە جۇمىس ىستەپ، وزىنە ۋاقىت پەن ءحوببيى ءارقاشان جەتىسپەيتىن. زەينەتكە شىققان سوڭ، ءۇي شارۋاسىمەن اينالىسىپ، نەمەرەسىن تاربيەلەدى.
«مەنى ورتالىققا ءبىر دوسىم شاقىردى. ءبىز بارىپ، جازىلدىق جانە بىردەن ساباققا قاتىستىق. ماعان وتە ۇنادى. باستاپقىدا مەن ورتالىققا تەك قارىم-قاتىناس جاساۋ ءۇشىن باردىم»، — دەيدى ءماديا ءاشىرباي قىزى.
ورتالىقتاعى ساباقتار تەك قانا ويىن-ساۋىق ەمەس، سونىمەن قاتار وعان قيىن ومىرلىك جاعدايلاردى جەڭۋگە دە كومەكتەستى.
«قىزىم قاتتى اۋىرىپ قالعان كەز بولدى. مەن قاتتى ۋايىمدادىم، كۇندىز-تۇنى ۇيىقتامادىم، دەنساۋلىعىم ناشارلادى. مەن ورتالىققا ءجيى بارىپ، ساباققا قاتىسا باستادىم، جانە بىرتىندەپ ءبارى ءوز ورنىنا كەلدى، قىزىم جاقساردى. ءقازىر ويلاپ قاراسام، مۇنداي قيىن كەزەڭدى دەپرەسسياسىز وتكەرگەنىمە تاڭدانامىن. مۇنىڭ ءبارى بەلسەندى ۇزاق ءومىر ءسۇرۋ ورتالىعىنىڭ ارقاسىندا بولدى. ول جەردە قايعىرۋعا ۋاقىت بولمادى، مەن بەلسەندى ءومىر ءسۇردىم»، — دەپ ەسكە الادى زەينەتكەر.
سونىمەن قاتار، ءماديا ءاشىرباي قىزى ورتالىقتا كوپتەن بەرگى ارمانى ورىندالعانىن ايتتى. ءقازىر ول تەاتر ۇيىرمەسىنە قاتىسىپ، ۆالس بيلەپ، ءتۇرلى كونكۋرستار مەن قويىلىمدارعا قاتىسادى. بۇگىن ول «قازاقكونسەرت» ساحناسىندا ونەر كورسەتىپ، كورەرمەندەردىڭ قوشەمەتىنە بولەندى.
«مەن ءارقاشان ۇلكەن ساحنادا ونەر كورسەتۋدى ارماندايتىنمىن، ءبىراق بۇل ماعان مۇمكىن ەمەس، ورىندالمايتىن ارمان سياقتى كورىندى. ال العاش رەت ساحنادا ونەر كورسەتكەن كەزدە تاڭ قالدىم. مەن ەشقاشان ءبيدى ونەر دەپ ويلاعان ەمەسپىن. كەش تە بولسا، ارمانىم ورىندالدى!»، — دەپ ويىمەن ءبولىستى ءماديا بايسابايەۆا.
زەينەتكەر قالا اكىمدىگىنە جاسىنا قاراماستان بەلسەندى ءومىر سۇرۋگە مۇمكىندىك بەرگەنى ءۇشىن العىسىن ءبىلدىردى.
«ءبىز ءبارىمىز سۇيىكتى ىسپەن اينالىسامىز، ورىندىقتاردا وتىرمايمىز، ومىرگە ريزامىز، دامۋدى جالعاستىرامىز، ۇيرەنەمىز، دەنساۋلىعىمىزدى باقىلايمىز، بيلەيمىز. ءبىز شابىتتانامىز، قۋاتتانامىز، بارلىق جاقىندارىمىز ءبىزدى قولدايدى»، — دەيدى ول.
الماتىداعى بەلسەندى ۇزاق ءومىر ءسۇرۋ ورتالىعىنىڭ ديرەكتورى ساۋلە بەكەتايەۆا «اسىل قازىنام» ۇزاق ءومىر ءسۇرۋ فەستيۆالىنىڭ تابىستى وتكەنىن اتاپ ءوتتى:
«فەستيۆال كەزىندە ساحنادا بىردە-بىر كاسىبي ەسترادالىق ءبيشى نەمەسە ءانشى بولعان جوق، بۇل فەستيۆال تەك بەلسەندى ۇزاق ءومىر ءسۇرۋ ورتالىعى مەن ونىڭ بولىمشەلەرىنىڭ شىعارماشىلىق ۇجىمدارىنىڭ قاتىسۋىمەن ءوتتى. فەستيۆالدەن كەيىن كوپتەگەن ادامدار ورتالىقتارعا كەلگىسى كەلدى. ۇزاق ءومىر ءسۇرۋ ورتالىقتارىنىڭ ارقاسىندا قالاداعى ءومىر ءسۇرۋ ۇزاقتىعى ارتىپ، سوڭعى 25 جىلدا رەكوردتىق كورسەتكىشكە جەتتى: الماتى بويىنشا — 78 جىل، رەسپۋبليكا بويىنشا — 75 جىل. بۇل كوپ نارسەنى اڭعارتادى»، — دەدى ساۋلە بەكەتايەۆا.
ەستەرىڭىزگە سالا كەتەيىك، بەلسەندى ۇزاق ءومىر ءسۇرۋ ورتالىقتارىنىڭ جۇمىسى زەينەتكەرلەردى فيزيكالىق جانە پسيحيكالىق دەنساۋلىعىن ۇزاق ساقتاپ، مادەني، شىعارماشىلىق، سپورتتىق جانە ىسكەرلىك ومىرگە ارالاسۋعا باعىتتالعان. ورتالىقتاردىڭ فيليالدارى قالانىڭ ءار اۋدانىندا بار، وندا بىلىكتى ماماندار مەن نۇسقاۋشىلار 40-تان استام الەۋمەتتىك قىزمەت ءتۇرىن تەگىن كورسەتەدى.