مەڭ مەن قالدىڭ قاتەرلى ىسىك تۋدىرۋ ءقاۋپى بار

ادام دەنەسىندەگى مەڭ مەن قالدىڭ تەرىدە قاتەرلى ىسىك تۋدىراتىن تۇرلەرى بار.

ونكولوگ دارىگەرلەر وسىلاي دەيدى. ادەتتە كەي ادام دەنەسىندەگى قال نەمەسە مەڭدى تابيعي ەرەكشەلىك دەپ، ءمان بەرمەيدى. ءتىپتى ونى دەنساۋلىعىنا ءقاۋىپسىز دەپ ويلايدى. الايدا دەنەدەگى وسكىننىڭ تۇر-تۇسىنە ءمان بەرگەن ءجون، دەپ حابارلايدى Almaty-akshamy.kz 24.kz-كە سىلتەمە جاساپ. 

عالىمدار ادام تەرىسىندە بولاتىن مەڭ مەن قالدىڭ 300-دەن استام ءتۇرىن انىقتاعان. ونىڭ ءبىرى ءتۋابىتتى، ءبىرى جۇرە پايدا بولادى. ءبىراق وسى وسىندىلەر مەن تەرىدەگى داقتاردىڭ ىشىندە ومىرگە ءقاۋىپ توندىرەتىندەرى دە بار. سولاردىڭ ءبىرى - مەلانوما. سوندىقتان ءقازىر تەرى مەلانوماسىن انىقتاۋ جانە ەمدەۋ ونكولوگيانىڭ كۇردەلى ماسەلەلەرىنىڭ بىرىنە اينالعان. جاس ۇلعايعان سايىن ادامنىڭ مەڭى اقىرىن وسەدى، ازداپ فورماسى وزگەرەدى. ءوڭى دە دەنە تۇسىندەي بولۋى مۇمكىن. بۇل قالىپتى جاعداي. ال ۇلكەيىپ، بەتكى قاباتى قارايا تۇسسە، بەتى قىشىپ، اۋىرسىنسا، وعان بەيجاي قاراۋعا بولمايدى. وندايدا دارىگەرگە قارالعان دۇرىس. ونىڭ سوڭى اۋىر جاعدايعا ۇلاسۋى مۇمكىن.

«ەڭ ءبىرىنشى، مامانعا بارۋ كەرەك. دەرماتولوگ نەمەسە ونكولوگتىڭ كەڭەسىن الىپ، سودان كەيىن ءقاۋىپتى ەمەس دەسە عانا الۋعا بولادى. ەگەر كوسمەتولوگيالىق سالونعا بارىپ العىزعىسى كەلسە، مىندەتتى تۇردە دارىگەرمەن كەڭەسىپ الۋ كەرەك. مەلانوما مەن بازالەما - تەرىنىڭ ءقاۋىپتى اۋرۋلارى. وتە جامان، 1-3 مم بولىپ ەكى-ۇش ايدا مەتاستازا بەرۋى مۇمكىن»، - دەيدى ونكولوگ دارىگەر ساكەن سابىربەكوۆ.

اۋرۋدى ۋاقىتىندا انىقتاۋ ماڭىزدى. مۇندايدا ءوزىن-وزى تەكسەرۋ ءادىسى كومەكتەسەدى. ايناعا قاراپ، تەرىدەگى بارلىق قارا، قىزىل، كوك نەمەسە قوڭىرقاي مەڭدەردى، داقتاردى، تۇيىندەردى تەكسەرىڭىز. ءقاۋىپتى مەڭ مەن داقتىڭ شەتتەرى بىركەلكى بولمايدى. سونداي-اق دەنەسىندە مەڭى كوپ ادام كۇن ساۋلەسىنەن ساقتانۋى كەرەك، دەيدى ماماندار. سەبەبءى وسكىندەرى بار ادامداردىڭ مەلانوماعا شالدىعۋ ءقاۋپى بار.