تۇڭعىش پرەزيدەنت كۇنى مەن ەل تاۋەلسىزدىگىنىڭ 30 جىلدىعى اياسىندا ءال-فارابي اتىنداعى قازاق ۇلتتىق ۋنيۆەرسيتەتىندە «مەن جاستارعا سەنەمىن!» اتتى رەسپۋبليكالىق پاتريوت جاستاردىڭ فورۋمى ءوتتى.
اتالمىش ءىس-شارانىڭ باستى ماقساتى – يننوۆاسيا مەن شىعارماشىلىقتى ۇشتاستىرۋ ارقىلى جاستار ءپاتريوتيزمىن دامىتۋ.
فورۋم جۇمىسىنا ءال-فارابي اتىنداعى قازۇۋ-دىڭ باسقارما ءتوراعاسى – رەكتورى جانسەيىت تۇيمەبايەۆ، ۇلتتىق كينونى قولداۋ مەملەكەتتىك ورتالىعىنىڭ باسقارما ءتوراعاسى ەسەتجان قوسۋبايەۆ، الماتى وبلىسى اقسۋ اۋدانى قاپال اۋىلدىق وكرۋگى اكىمى اپپاراتىنىڭ باس مامانى ۆلاديمير چەپەل، ق ر مادەنيەت سالاسىنىڭ ۇزدىگى، اقىن باقىت جاعىپار ۇلى جانە فورۋم جەڭىمپازدارى مەن ستۋدەنتتەر قاتىستى.
ۋنيۆەرسيتەت رەكتورى جانسەيىت تۇيمەبايەۆ بارلىق فورۋمعا قاتىسۋشىلاردى قۇتتىقتاپ، ىستىق لەبىزىن ءبىلدىردى.
– قازاقستان – دارىندى جاستار مەكەنى. ءبىزدىڭ ەلىمىزدە جاستاردىڭ الاڭسىز وقىپ، ءبىلىم الۋىنا، شىعارماشىلىقپەن اينالىسىپ، قالاعان ماماندىق يەسى اتانۋىنا بارلىق جاعداي جاسالعان. قازاقستاننىڭ بولاشاعى ەڭ الدىمەن سىزدەرگە، سىزدەردىڭ بىلىمدەرىڭىزگە، ەنەرگيالارىڭىز بەن پاتريوتيزمدەرىڭىزگە بايلانىستى. تاۋەلسىز ەلىمىزدىڭ ماقتانىشىنا اينالىپ، ءومىردىڭ بارلىق سالالارىندا ۇلكەن جەتىستىكتەرگە جەتۋلەرىڭىزگە شىن جۇرەكتەن تىلەكتەسپىن! – دەدى ول.
رەسپۋبليكالىق فورۋمعا ەلىمىزدىڭ بارلىق وڭىرلەرىنەن 2000-عا جۋىق جۇمىس قابىلدانسا، ولاردىڭ 107ء-سى ماراپات كەشىنە جولداما الىپ وتىر. بيىل فورۋمعا قاتىسۋشىلار ەسسە جازۋ، يننوۆاسيالىق جوبا، كوركەم ءسوز وقۋ، بەينەروليك دايىنداۋ، ازاماتتىق-پاتريوتتىق باعىتتاعى پوەزيالىق شىعارما جازۋ، سىبايلاس جەمقورلىققا قارسى جوبا مەن سۋرەت ونەرى سياقتى سەگىز باعىت بويىنشا ب ا ق سىناستى.
گالا-كونسەرت بارىسىندا ءار نوميناسيا بويىنشا جەڭىسكە جەتكەن گران-پري يەگەرلەرىنە ءبىر جىلدىق گرانت سەرتيفيكاتى تابىستالدى. سونىمەن قاتار شارادا ءبىرىنشى، ەكىنشى جانە ءۇشىنشى ورىن يەگەرلەرى دە ماراپاتتالدى. شارا سوڭى كونسەرتتىك باعدارلاماعا ۇلاستى.