ماديان ءاديات قىزى، ءۇي شارۋاسىنداعى ايەل:
– وتكەن جۇمادا «سپۋتنيك V» ۆاكسيناسىنىڭ ەكىنشى دوزاسىن الدىم. باستاپقىدا ەكپە ەكتىرۋدەن قاتتى قورىقتىم. سەبەبى، الەۋمەتتىك جەلىلەردەن ءتۇرلى اقپاراتتار كەلىپ، ۇرەيىمىزدى ۇشىردى. ىندەت ەلىمىزدە بەلەڭ الا باستاعاندا اينالامداعى ادامداردىڭ ءبىرازعا جۋىعى اۋىرىپ، اۋرۋحانادا 15 كۇندەي جاتتى. ولاردىڭ قينالىسىن كورىپ ۆيرۋستى جۇقتىرىپ الماۋ ءۇشىن بارىنشا ساقتاندىم. ەلىمىزگە ەكپەنىڭ مىڭداعان دوزاسى كەلگەندىگىن ەستىپ، جۇبايىم ەكەۋمىز قالاداعى №22 ەمحاناعا باردىق. سول جەردە ەكپە ەكتىردىك. ەمحاناداعى مەديسينا قىزمەتكەرلەرىنىڭ ءتۇسىندىرۋ جۇمىستارىنا، بارلىق جاعدايدى ءوز باقىلاۋىندا ۇستايتىنى كوڭىلىمنەن شىقتى. قازىرگى تاڭدا ءبىراز الەم ەلدەرىنە قاراساق، ول جاقتاعى ەپيداحۋلدىڭ جانتۇرشىگەرلىك كۇيدە ەكەندىگىن كورەمىز. سان مىڭداعان ادام ومىردەن ءوتىپ جاتىر. كوپتەگەن ەلدىڭ ەكونوميكاسىنا دا وراسان زور زيان كەلۋدە. ءبىز دە سولاردىڭ قاتارىندا بولعانىمىزدى قالاماساق، ەكپە الۋدان قاشپايىق دەگىم كەلەدى.
ءازىرلەگەن اقتولقىن تۇرلىعازى.