ىشكى ءتۋريزمدى دامىتۋعا باعىتتالعان الەۋمەتتىك جوبانىڭ تالابى بويىنشا قاتىسۋشىلار ىلە الاتاۋىنداعى 15 شىڭدى باعىندىرۋى كەرەك بولاتىن. قاتىسۋعا نيەت بىلدىرگەن 2500 ادامنىڭ، 50-دەن استامى بارلىق 15 شىڭعا قيىندىقسىز شىققان.
«مەن باعىندىرعان الاتاۋدىڭ 15 شىڭى» الەۋمەتتىك جوباسى ەكى جىل بۇرىن باستالعان، دەپ حابارلايدى Almaty-akshamy.kz 24.kz-كە سىلتەمە جاساپ.
ماقسات – ىشكى ءتۋريزمدى دامىتۋ، تابيعاتتىڭ كەرەمەتىن كورسەتۋ، دەيدى ۇيىمداستىرۋشىلار. الاتاۋدى بەتكە العاندار بۇرىننان تانىمال «كوك جايلاۋ» مەن «فۋرمانوۆ» شىڭىن باعدار ەتەدى. ال شىن مانىندە جاڭا باعىتتار وتە كوپ. ۇيىمداستىرۋشىلار الپينيزم فەدەراسياسى ماماندارى مەن كاسىبي گيدتەرمەن اقىلداسىپ، الماتى ماڭىنان قولجەتىمدى 15 شىڭدى انىقتاپ، تۋريستىك ايماقتى كەڭەيتتى.
قاجىم جۇمالييەۆ، "تابيعات" رەسپۋبليكالىق قاۋىمداستىعىنىڭ جەتەكشىسى: - مۇنداي كەرەمەت ناتيجە بولادى دەپ ءوزىمىز دە كۇتكەن جوقپىز. جوباعا 2500 ادام قاتىستى. جوبا تالابى بويىنشا ولار وزدەرىن شىڭ باسىندا سۋرەتكە ءتۇسىرىپ، ارنايى حەشتەگتى بەلگىلەدى. ولارعا ءار شىڭدى باعىندىرعان سايىن، زناچوك بەردى. ناتيجەسىندە 57 ادام 15 شىڭعا شىقتى. اۋەسقوي الپينيستەردى ماراپاتتاۋ سالتانىناتىنا جاقىندا عانا الەمنىڭ ەڭ بيىك شىڭى ەۆەرەستى باعىندىرعان تۇڭعىش قازاق قىزى انار بۋراشيەۆا دا كەلدى.
انار بۋراشيەۆا، ەۆەرەست شىڭىن باعىندىرعان الپينيست: - مەنىڭ ويىمشا، الپينيستىك جول، ول وتە قيىن. ءبىراق ءبىز، بىرىنشىدەن ءوزىمىزدىڭ وتانىمىزدان باستاۋ كەرەكپىز. سوندىقتان ءار ادام وسى 15 شىڭدى باعىندىرعان، مەنىڭ ويىمشا ناعىز پاتريوتتار شىعار. ويتكەنى بۇل جەڭىل ەمەس. كەيبىرەۋلەرى جەڭىل بولسا كەيبىرەۋلەرى تەحنيكالىق وتە قيىن، ءقاۋىپتى. سوندىقتان مەن وتە ريزامىن.
اۋەسقوي الپينيستەر باعىندىرعان شىڭداردىڭ قاتارىندا تەڭىز دەڭگەيىنەن 4000 مەتر بيىك تاۋلار دا بار. بارلىق قاتىسۋشىلار الپينيزم تەحنيكاسىنىڭ نەگىزدەرىن ۇيرەتەتىن كاسىبي مامانداردىڭ دايىندىعىنان ءوتتى.