الەۋمەتتىك جەلىدە تۇركىستان قالاسىنداعى 2021 جىلى پايدالانۋعا بەرىلگەن كەرۋەن ساراي كەشەنىندە ءساندى دەكوراتيۆتىڭ جەلمەن دومالاپ بارا جاتقان ۆيدەوسى تاراۋدا. ونى عالامتورعا جۇكتەگەندەر ونى «باۋىرساق» ەرتەگىسىندەگى «باۋىرساققا» تەڭەگەن.
بۇل جاعدايعا بايلانىستى تۇركىستان وبلىسى اكىمدىگىنىڭ باسپا ءسوز قىزمەتى تۇسىنىكتەمە بەردى. بۇل شار ينۆەستورلاردىڭ ەسەبىنەن سالىنعان، دەپ حابارلايدى Almaty-akshamy.kz Astanatv.kz-كە سىلتەمە جاساپ.
«اقپاراتتا كورسەتىلگەن وقيعا 28 جەلتوقسان كۇنى تۇركىستان قالاسىنداعى كەرۋەن ساراي كەشەنىندە بولعان. قاتتى جەلدىڭ سالدارىنان ساندىك (دەكوراتيۆتى) شاردىڭ ءبىرى ءۇزىلىپ، سۋ باسسەينىنە تۇسكەن. شاردىڭ سالماعى 5 كەلىدەن اسپايتىن، جەڭىل بولۋى سەبەپتى جەلدىڭ ەكپىنىمەن قوزعالىپ ۇزىلگەنىن جانە بۇل كەلەڭسىزدىكتەن ەشكىم زارداپ شەكپەگەنىن حابارلايمىز. قازىرگى تاڭدا شار بەلگىلەنگەن ورنىنا قايتا بەكىتىلىپ، قالپىنا كەلتىرىلدى»، - دەلىنگەن جاۋاپ بەرىلدى.
تۇركىستان قالاسىندا اۋا رايى جايلى بولاتىنى بەلگىلى. دەگەنمەن، اۋا رايىنىڭ توسىن مىنەز تانىتپاسىنا كەپىلدىك جوق.
الەۋمەتتىك جەلىدە دومالاعان شار قۇساپ، تارالىپ جاتقان بۇل ۆيدەونىڭ سوڭىندا جازىلعان پىكىرلەردىڭ ءبىر پاراسىن نازارلارىڭىزعا ۇسىنساق:
«بيۋدجەتتىڭ اقشاسى وسىلاي دومالاپ كەتە بەرەدى)»، «1 ملن تەڭگە ءتۇسىپ قالدى»، «جاقسى ءومىردى ىزدەپ كەتكەن شىعار...»، «قازاقستانداعى ازىق-تۇلىك باعاسى سياقتى بۇل دا ەركىن اينالىمعا كەتتى»،«جەمقورلىق. سودان قاشىپ كەتكەن عوي».