مەمورگاندار مەن ۇەۇ ازاماتتىق جانە ساياسي قۇقىقتار جونىندەگى حالىقارالىق پاكت بويىنشا قازاقستان باياندامالارىن تالقىلادى
قازاقستاننىڭ سىرتقى ىستەر مينيسترلىگىندە ەرەكشە تاپسىرمالار جونىندەگى ەلشى ۇسەن سۇلەيمەننىڭ توراعالىعىمەن «ادامي ولشەم جونىندەگى ديالوگ الاڭى» كونسۋلتاتيۆتىك-كەڭەسشى ورگانىنىڭ («ءاودا» ككو) كەزەكتى ونلاين-وتىرىسى ءوتتى.
ءىس-شاراعا قازاقستاندىق ادام قۇقىقتارىن قورعاۋ سالاسىنداعى ۇكىمەتتىك ەمەس ۇيىمدارى، پارلامەنت دەپۋتاتتارى، پرەزيدەنت جانىنداعى ادام قۇقىقتارى جونىندەگى كوميسسيا حاتشىسى، ق ر ادام قۇقىقتارى جانە بالا قۇقىقتارى جونىندەگى ۋاكىلدەرى، جوعارعى سوت، كونستيتۋسيالىق كەڭەس، مۇددەلى مينيسترلىكتەردىڭ، سونداي-اق حالىقارالىق سەرىكتەستەر – بۇۇ دامۋ باعدارلاماسى، ادام قۇقىقتارى جونىندەگى جوعارعى كوميسسار باسقارماسى، ەقىۇ، ەۋروپا وداعى، اقش-تىڭ جانە كانادانىڭ ەلشىلىكتەرى، يۋسايد جانە «حالىقارالىق تۇرمە رەفورماسى» ۇەۇ وكىلدەرى قاتىستى.
وتىرىستى اشقان ۇسەن سۇلەيمەن 2021 جىلعى 9 ماۋسىمدا پرەزيدەنت قاسىم-جومارت توقايەۆتىڭ «قازاقستان رەسپۋبليكاسىنىڭ ادام قۇقىقتارى سالاسىنداعى ودان ءارى شارالارى تۋرالى» جارلىققا قول قويۋىنىڭ جانە ادام قۇقىقتارى سالاسىنداعى ءبىرىنشى كەزەكتەگى شارالار جوسپارىن ىسكە اسىرۋدىڭ ماڭىزدىلىعىن اتاپ ءوتتى.
«جارلىق پەن جوسپار تاۋەلسىزدىك العان ساتتەن باستاپ ەلدەگى جۇيەلى جۇمىستىڭ قورىتىندىسى بولدى. الايدا، قازاقستاننىڭ ودان ءارى ەكونوميكالىق ءوسۋى ەكونوميكامىزدىڭ وڭىرلىك جانە الەمدىك ولشەمدەردەگى باسەكەگە قابىلەتتىلىگىنە تىكەلەي بايلانىستى – جانە بۇل جەردە ادام قۇقىقتارىنىڭ دامىعان جۇيەسى بولماي ءىس العا باسپايدى»، - دەدى ۇسەن سۇلەيمەن.
وسىعان بايلانىستى مەملەكەت باسشىسى ادام قۇقىقتارىن قورعاۋدىڭ ۇلتتىق تەتىكتەرىن جەتىلدىرۋدىڭ ەل ءۇشىن اسا ماڭىزدى توعىز باعىتىن ايقىندادى.
«مەملەكەت باسشىسى باستاعان جۇمىستىڭ تابىستى بولۋىنىڭ كوپتەگەن فاكتورلارىن اتاۋعا بولادى. ءبىراق نەگىزگى ءارى شەشۋشى فاكتور – ەل ازاماتتارىنىڭ قۇقىقتارىن قورعاۋ سالاسىندا ساعات سايىن «ميكرو» دەڭگەيدە جۇمىس ىستەيتىن ازاماتتىق قوعامىمىزداعى سەرىكتەستەردىڭ بەلسەندىلىگى. وسى پراكتيكتەر عانا قازاقستاننىڭ قۇقىق قورعاۋ جۇيەسىنىڭ بارلىق ءالسىز تۇستارىن كورۋ ارقىلى ولاردى قازاقستاننىڭ قاجەتتىلىكتەرى مەن مىندەتتەرىنە سايكەس كەلتىرۋگە جانە تەڭەستىرۋگە كومەكتەسە الادى» - دەپ اتاپ كورسەتتى ۇسەن سۇلەيمەن.
وسى ورايدا مەملەكەتتىك ورگاندار مەن ۇكىمەتتىك ەمەس سەكتور اراسىنداعى سىندارلى ديالوگتى جالعاستىرۋدىڭ ماڭىزدىلىعىن اتاپ ءوتتى.
وتىرىسقا قاتىسۋشىلار ءومىر ءسۇرۋ، جەكە باسقا قول سۇقپاۋشىلىق قۇقىقتارى، ازاپتاۋدان بوستاندىق، ءسوز جانە ءوز پىكىرىن ءبىلدىرۋ بوستاندىعى، بىرلەسۋ جانە بەيبىت جينالىستار وتكىزۋ بوستاندىعى، ءدىن جانە سەنىم بوستاندىعى، ەركىن ءجۇرىپ-تۇرۋ بوستاندىعى جانە ميگرانتتاردىڭ، بوسقىندار مەن قاماۋعا الىنعان ادامداردىڭ قۇقىقتارىن قوسا العاندا ازاماتتىق جانە ساياسي قۇقىقتار جونىندەگى حالىقارالىق پاكتىنىڭ ورىندالۋ بارىسى جونىندەگى قازاقستان رەسپۋبليكاسىنىڭ بايانداماسىن قورعاۋعا دايىندىق ماسەلەلەرىن تالقىلادى.
كەزدەسۋ سوڭىندا ادام قۇقىقتارى سالاسىنداعى ءبىرىنشى كەزەكتەگى شارالار جوسپارىن ورىنداۋ بويىنشا 2021 جىلدىڭ سوڭىنا دەيىن «ءاودا» ككو-نىڭ قاعيدالارى مەن جۇمىس جوسپارى قاراستىرىلدى.
كۇن تارتىبىندەگى ءاربىر ماسەلەگە قاتىستى پىكىرتالاستار مەملەكەتتىك ورگاندار مەن ۇكىمەتتىك ەمەس ۇيىمداردىڭ بۇدان ءارى ءوزارا ءىس-قيمىلى بويىنشا ناقتى ۇسىنىستاردىڭ ازىرلەنۋىن كوزدەپ، اشىق ءارى سىندارلى سيپاتقا يە بولدى.